തിരുവനന്തപുരം: വാഹനാപകടത്തില്‍ പരിക്കേറ്റ സംഗീതജ്ഞന്‍ ബാലഭാസ്‌കറിന് അടിയന്തര ചികിത്സ. ഇന്ന് പുലര്‍ച്ചെ ഉണ്ടായ കാറപകടത്തില്‍ ഗുരുതരമായി പരിക്കേറ്റ ബാലഭാസ്‌കറിന്റെ നില ഗുരുതരമായി തുടരുന്നുവെന്നാണ് അടുത്ത വൃത്തങ്ങള്‍ അറിയിച്ചത്.

അപകടത്തില്‍ മകള്‍ തേസ്വിനി ബാല (2) മരിച്ചു. ഭാര്യ ലക്ഷ്മിക്കും കാര്‍ ഡ്രൈവര്‍ അര്‍ജുനും പരിക്കേറ്റു. അപകടത്തില്‍ ബാലഭാസ്‌കറിന്റെ എല്ലുകള്‍ പൊട്ടി. രക്തസമ്മര്‍ദം കുറഞ്ഞു നില്‍ക്കുന്നത് ശസ്ത്രക്രിയ നടത്താന്‍ ബുദ്ധിമുട്ടുണ്ടാക്കുന്നുണ്ട്. ശസ്ത്രക്രിയക്ക് ശേഷമേ ആരോഗ്യസ്ഥിതിയേക്കുറിച്ച് കൃത്യമായി പറയാനാകൂ എന്നാണ് ഡോക്ടര്‍മാര്‍ അറിയിച്ചത്. ഭാര്യ ലക്ഷ്മിയുടെ സ്ഥിതി മെച്ചപ്പെട്ടു വരുന്നു.

തൃശ്ശൂര്‍ വടക്കും നാഥ ക്ഷേത്രദര്‍ശനത്തിന് ശേഷം തിരുവനന്തപുരത്തേക്ക് മടങ്ങുന്ന വഴിക്കാണ് അപകടമുണ്ടായത്.കഴക്കൂട്ടം മംഗലപുരത്ത് വച്ച് പുലര്‍ച്ചെ 4.30 ഓടെയായിരുന്നു അപകടം. ഡ്രൈവര്‍ ഉറങ്ങിപ്പോയതിനെ തുടര്‍ന്ന് നിയന്ത്രണം വിട്ട ഇന്നോവക്കാര്‍ മരത്തിലേക്ക് ഇടിച്ചു കയറുകയായിരുന്നു. ഇടിയുടെ ആഘാതത്തില്‍ കാര്‍ പൂര്‍ണമായും തകര്‍ന്നു. ബാലഭാസ്‌കറും ഭാര്യയും മകളുമടക്കം നാലുപേരാണ് കാറിലുണ്ടായിരുന്നത്.