ന്യൂഡല്‍ഹി : രാജ്യത്ത് ശൈശവാരോഗ്യ സൂചികയില്‍ കേരളം ഒന്നാമത്. കുട്ടികളുടെ ആരോഗ്യ, പോഷകാഹാര, വിദ്യാഭ്യാസ രംഗത്തെല്ലാം മികച്ച പ്രകടനം കാഴ്ചവെച്ചാണ് കേരളം പട്ടികയില്‍ ഒന്നാമതെത്തിയത്. സന്നദ്ധസംഘടനകളായ വേല്‍ഡ് വിഷന്‍ ഇന്ത്യയും, ഐഎഫ്എംആര്‍ ലീഡും ചേര്‍ന്നാണ് ചൈല്‍ഡ് വെല്‍ബീയിങ് ഇന്‍ഡെക്‌സ് തയ്യാറാക്കിയത്. 

സൂചികയില്‍ കേരളം 0.76 പോയിന്റോടെയാണ് ഒന്നാമതെത്തിയത്. 0.67 പോയിന്റുമായി തമിഴ്‌നാടും ഹിമാചല്‍ പ്രദേശും തൊട്ടുപിന്നിലെത്തി. 0.53 പോയിന്റ് നേടിയ മേഘാലയ, 0.50 പോയിന്റോടെ ജാര്‍ഖണ്ഡ്, 0.44 പോയിന്റുള്ള മധ്യപ്രദേശ് എന്നീ സംസ്ഥാനങ്ങളാണ് പട്ടികയില്‍ ഏറ്റവും പിന്നില്‍. 

കേന്ദ്രഭരണപ്രദേശങ്ങളില്‍ പുതുച്ചേരി 0.77 പോയിന്റ് നേടി മുന്നിലെത്തി. 0.52 പോയിന്റ് നേടിയ ദാദ്ര നഗര്‍ ഹവേലിയാണ് ഏറ്റവും പിന്നില്‍. കുട്ടികളുടെ ആരോഗ്യകരമായ വ്യക്തിത്വ വികസനം, ഗുണപരമായ ബന്ധങ്ങള്‍, സുരക്ഷ എന്നീ മൂന്നു മേഖലകള്‍ കേന്ദ്രീകരിച്ചാണ് സൂചിക തയ്യാറാക്കിയത്. 

കുട്ടികളുടെ ആരോഗ്യസംരക്ഷണത്തിനായി കേരള സര്‍ക്കാര്‍ കാണിക്കുന്ന ശ്രദ്ധ ഏറെ മാതൃകാപരമാണെന്ന് റിപ്പോര്‍ട്ടില്‍ ചൂണ്ടിക്കാട്ടുന്നു. കുട്ടികളുടെ പോഷകാഹാരം, ശുദ്ധജല ലഭ്യത, ശുചിത്വ സംവിധാനങ്ങള്‍ എന്നിവയും റിപ്പോര്‍ട്ടില്‍ എടുത്തുകാണിക്കുന്നു.