തിരുവനന്തപുരം: അടുത്ത ദിവസങ്ങളിൽ  സംസ്ഥാനത്ത് എല്ലാ ജില്ലകളിലും പരക്കെ മഴ പെയ്യുമെന്ന് കാലാവസ്ഥാ നിരീക്ഷണ കേന്ദ്രം. എന്നാൽ ശക്തമായ മഴയുണ്ടാകുമെന്ന് മുന്നറിയിപ്പില്ല. കഴിഞ്ഞ രണ്ടുമൂന്നു ദിവസങ്ങളായി ഒറ്റപ്പെട്ട മഴ ലഭിക്കുന്നുണ്ട്. 

ജൂൺ ഒന്നുമുതൽ ജൂലായ് 10 വരെ സംസ്ഥാനത്ത് 510.2 മില്ലീ മീറ്റർ മഴ പെയ്തതായി കാലാവസ്ഥാ നിരീക്ഷണ കേന്ദ്രം അറിയിച്ചു. 890.9 മില്ലീ മീറ്ററായിരുന്നു ലഭിക്കേണ്ടിയിരുന്നത്. 43 ശതമാനത്തിന്റെ കുറവ്. ഇടുക്കി ജില്ലയിലാണ് ഇക്കാലയളവിൽ ഏറ്റവും കുറച്ച് മഴപെയ്തത്. ഇവിടെ 56 ശതമാനം മഴക്കുറവാണ് രേഖപ്പെടുത്തിയത്.

ഏറ്റവും കൂടുതൽ മഴ ലഭിച്ചത് തിരുവനന്തപുരം ജില്ലയിലാണ്. 394.5 മില്ലീ മീറ്റർ മഴ ലഭിക്കേണ്ടിടത്ത് 302.4 മില്ലീ മീറ്റർ ലഭിച്ചു. ഇവിടെ 23 ശതമാനത്തിന്റെ മഴക്കുറവാണുള്ളത്. വയനാട്, പത്തനംതിട്ട ജില്ലകളിലും ഇക്കാലയളവിൽ ലഭിക്കേണ്ട മഴയുടെ പകുതിയിൽ താഴെ മാത്രമാണ് ലഭിച്ചത്.