തിരുവനന്തപുരം: കല്ലട ബസില് യാത്രക്കാരിയെ ഡ്രൈവര് പീഡിപ്പിക്കാന് ശ്രമിച്ച സംഭവത്തില് വനിതാ കമ്മീഷന് സ്വമേധയാ കേസെടുത്തു. ബസ് ഉടമയെ വിളിച്ചുവരുത്തി വിശദീകരണം തേടുമെന്നും വനിതാ കമ്മീഷന് അറിയിച്ചു.
സ്ത്രീകള്ക്ക് സുരക്ഷിതമായി യാത്ര ചെയ്യാന് കല്ലട ബസ് എന്തെല്ലാം സംവിധാനങ്ങള് ഒരുക്കിയിട്ടുണ്ടെന്ന് കമ്മീഷന് പരിശോധിക്കുമെന്ന് അധ്യക്ഷ എം സി ജോസഫൈന് പറഞ്ഞു. യാത്രക്കിടെ പ്രാഥമിക ആവശ്യങ്ങള് നിര്വഹിക്കുന്നതിന് പോലും ബസിലെ ജീവനക്കാര് സ്ത്രീകള്ക്ക് ബസ് നിര്ത്തികൊടുക്കുന്നില്ലെന്ന് കമ്മീഷന് പരാതികള് ലഭിച്ചിട്ടുണ്ട്.ഇക്കാര്യവും അന്വേഷിക്കുമെന്നും ജോസഫൈന് പറഞ്ഞു.
വ്യാഴാഴ്ച പുലര്ച്ചെ രണ്ടുമണിയോടെ കോഴിക്കോട് വെച്ചായിരുന്നു സംഭവം. കണ്ണൂരില് നിന്നും കൊല്ലത്തേക്ക് പോകുകയായിരുന്ന തമിഴ്നാട് സ്വദേശിനിയായ യുവതിക്ക് നേരെയാണ് പീഡനശ്രമം ഉണ്ടായത്. സഹയാത്രികര് ഇടപെട്ട് ബസിന്റെ രണ്ടാം ഡ്രൈവര് കോട്ടയം പുതുപ്പള്ളി സ്വദേശി ജോണ്സണ് ജോസഫിനെ പിടികൂടി പൊലീസില് ഏല്പ്പിക്കുകയായിരുന്നു.
കല്ലട ബസിലെ പീഡനശ്രമത്തില് കര്ശന നടപടികളുമായാണ് സര്ക്കാര് മുന്നോട്ടുപോകുന്നത്. ജോണ്സണ് ജോസഫിന്റെ ലൈസന്സ് റദ്ദാക്കുമെന്ന് ഗതാഗത മന്ത്രി എ കെ ശശീന്ദ്രന് പറഞ്ഞു. ഇതുമായി ബന്ധപ്പെട്ട് ഉദ്യോഗസ്ഥര്ക്ക് നിര്ദേശം നല്കിയതായും മന്ത്രി പറഞ്ഞു.
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ