പാലക്കാട്: നടൻ ബിനീഷ് ബാസ്റ്റിനു പാലക്കാട് ഗവ. മെഡിക്കൽ കോളജ് യൂണിയന്റെ പരിപാടിയിലുണ്ടായ ദുരനുഭവത്തിൽ മന്ത്രി എകെ ബാലൻ പ്രിൻസിപ്പലിനോടു വിശദീകരണം ആവശ്യപ്പെട്ടു. വ്യാഴാഴ്ച വൈകിട്ടു നടന്ന പരിപാടിയിൽ മുഖ്യാതിഥിയായിരുന്ന ബിനീഷിനൊപ്പം വേദി പങ്കിടില്ലെന്ന് സംവിധായകൻ അനിൽ രാധാക‍ൃഷ്ണൻ മേനോൻ പറഞ്ഞെന്ന യൂണിയൻ ഭാരവാഹികളുടെ വെളിപ്പെടുത്തലോടെയാണ് വിവാദം തുടങ്ങിയത്.

ബിനീഷിനെ പരിപാടിക്കു ക്ഷണിച്ചിട്ടില്ലെന്നു പ്രിൻസിപ്പൽ ഡോ. ടിബി കുലാസ് മാധ്യമങ്ങളോടു പറഞ്ഞെങ്കിലും പ്രിൻസിപ്പലിനെ അറിയിച്ചിരുന്നതായി യൂണിയൻ ചെയർമാൻ കെ വൈഷ്ണവ് വ്യക്തമാക്കി. മാഗസിൻ പ്രകാശനത്തിനാണ് അനിലിനെ ക്ഷണിച്ചത്. അദ്ദേഹം പ്രസംഗിക്കുന്നതിനിടെ വേദിയിലെത്തി ബാസ്റ്റിൻ നിലത്തിരുന്നു പ്രതിഷേധിക്കുകയായിരുന്നു.

രണ്ട് അതിഥികളും പങ്കെടുക്കുന്ന രണ്ട് പരിപാടികളാണ് ആസൂത്രണം ചെയ്തിരുന്നത്.  ജാതി, മത പരിഗണനകൾ ഉണ്ടായിട്ടില്ലെന്നുമാണ് കോളജ് യൂണിയന്റെ വിശദീകരണം.