കോഴിക്കോട്: പന്തീരാങ്കാവിലെ യുഎപിഎ അറസ്റ്റിന് എതിരെ സിപിഎമ്മില് പ്രമേയം. സിപിഎം കോഴിക്കോട് സൗത്ത് ഏര്യ കമ്മറ്റിയാണ് പൊലീസ് നടപടിക്ക് എതിരെ പ്രമേയം പാസാക്കിയത്. യുവാക്കള്ക്ക് എതിരെ ധൃതിപിടിച്ച് യുഎപിഎ ചുമത്തി. ലഘുലേഖയോ നോട്ടീസോ കൈവശംവയ്ക്കുന്നതിന് യുഎപിഎ ചുമത്താന് സാധിക്കില്ലെന്നും പ്രമേയത്തില് പറയുന്നു.
പൊലീസിന്റെത് ജനാധിപത്യ അവകാശങ്ങള് കവര്ന്നെടുക്കുന്ന നടപടിയാണെന്നു പന്തീരാങ്കാവില് നടന്നത് യുഎപിഎ നിയമത്തിന്റെ ദുരുപയോഗമാണെന്നും പ്രമേയത്തില് പറയുന്നു.
കോഴിക്കോട് പന്തീരാങ്കാവ് സ്വദേശികളായ അലന് ഷുഹൈബ്, താഹ ഫസല് എന്നിവരാണ് കഴിഞ്ഞ ദിവസം പൊലീസ് പിടിയിലായത്. ഇവര് സിപിഎം ബ്രാഞ്ച് കമ്മിറ്റി അംഗങ്ങളാണ്. അലന് ഷുഹൈബ് സിപിഎം തിരുവണ്ണൂര് ബ്രാഞ്ച് കമ്മിറ്റി അംഗവും, താഹ പാറമ്മല് ബ്രാഞ്ച് കമ്മിറ്റി അംഗവുമാണ്. ഇവര് മാവോയിസ്റ്റ് ലഘുലേഖ വിതരണം ചെയ്തെന്നും, ലഘുലേഖകള് കണ്ടെടുത്തതായും പൊലീസ് അറിയിച്ചു.
അറസ്റ്റിലായ വിദ്യാര്ത്ഥികള്ക്ക് എതിരെ പൊലീസ് ചുമത്തിയിരിക്കുന്നത് ജീവപര്യന്തം വരെ ലഭിക്കാന് സാധ്യതയുള്ള കുറ്റങ്ങളാണ്. യുഎപിഎ 20, 38, 39 വകുപ്പുകളാണ് വിദ്യാര്ത്ഥികള്ക്ക് എതിരെ പൊലീസ് ചുമത്തിയിരിക്കുന്നത്. നിരോധിക സംഘടനകളില് അംഗമായി, ആശയങ്ങള് പ്രചരിപ്പിച്ചു തുടങ്ങിയ വകുപ്പുകളാണ് ചേര്ത്തിരിക്കുന്നത്. വിദ്യാര്ത്ഥികളെ പതിനാല് ദിവസത്തേക്ക് കോഴിക്കോട് ജില്ലാ സെഷന്സ് കോടതി റിമാന്ഡ് ചെയ്തു. ഇരുവരുടെയും ജാമ്യാപേക്ഷ കോടതി തിങ്കളാഴ്ച പരിഗണിക്കും.
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ