മഞ്ചേശ്വരം : ആചാരം പാലിച്ച് ആര്‍ക്ക് വേണമെങ്കിലും ശബരിമലയില്‍ പ്രവേശനമാകാമെന്ന് മഞ്ചേശ്വരത്തെ എല്‍ഡിഎഫ് സ്ഥാനാര്‍ഥി ശങ്കര്‍ റെ. ശബരിമലയില്‍ ആചാരം ലംഘിക്കുന്നതിനോട് യോജിപ്പില്ല. വിശ്വാസമുള്ളവര്‍ക്ക് അവിടുത്തെ ആചാരങ്ങളനുസരിച്ച് പോകാമെന്ന് പറയുന്ന ആളാണ് താനെന്നും ശങ്കര്‍ റെ പറഞ്ഞു. 

കാസര്‍കോട് പ്രസ് ക്ലബ്ബില്‍ സ്ഥാനാര്‍ത്ഥികളുടെ  മുഖാമുഖം പരിപാടിയിലാണ് ശങ്കര്‍ റെ നിലപാട് വ്യക്തമാക്കിയത്. ശബരിമലയില്‍ പോകേണ്ട എന്ന് ആരോടും പറയുന്നില്ല. പക്ഷേ, ശബരിമലയിലെ ആചാരമനുസരിച്ച് ചില ക്രമങ്ങളുണ്ട്, പോകുന്നവര്‍ അത് പാലിക്കണമെന്നാണ് തന്റെ വിശ്വാസം. അത് പാലിക്കാതെ ആര് പോയാലും തെറ്റാണെന്നും അദ്ദേഹം പറഞ്ഞു.

കോടതി വിധി നടപ്പാക്കേണ്ടതാണ്. അതിനെ കുറിച്ച് സര്‍ക്കാരാണ് പറയേണ്ടത്. നിലവിലുള്ള രീതി തുടരട്ടെയെന്നാണ് തന്റെ അഭിപ്രായമെന്നും ശങ്കര്‍ റെ വ്യക്തമാക്കി.