ആലപ്പുഴ : നിയമസഭ ഉപതെരഞ്ഞെടുപ്പില്‍ അരൂരിലും എറണാകുളത്തും എന്‍ഡിഎ സ്ഥാനാര്‍ത്ഥികള്‍ക്ക് ജയസാധ്യതയില്ലെന്ന് ബിഡിജെഎസ് സംസ്ഥാന അധ്യക്ഷന്‍ തുഷാര്‍ വെള്ളാപ്പള്ളി. എറണാകുളത്തും അരൂരിലും ബിജെപി സ്ഥാനാര്‍ത്ഥികള്‍ക്ക് വിജയസാധ്യത കുറവാണ്. രണ്ട് മണ്ഡലങ്ങളില്‍ തോല്‍വി സമ്മതിക്കുന്നത് കണക്കുകളുടെ അടിസ്ഥാനത്തിലാണ്.
അതേസമയം മറ്റ് മൂന്ന് മണ്ഡലങ്ങളിലും എന്‍ഡിഎ സ്ഥാനാര്‍ത്ഥിക്ക് ജയസാധ്യതയുണ്ടെന്നും തുഷാര്‍ വെള്ളാപ്പള്ളി പറഞ്ഞു. ഒരു സീറ്റില്‍ ജയം ഉറപ്പെന്ന ബിജെപി സംസ്ഥാന അധ്യക്ഷന്‍ പി എസ് ശ്രീധരന്‍പിള്ളയുടെ പ്രസ്താവനയെക്കുറിച്ച് അറിയില്ലെന്നും തുഷാര്‍ വ്യക്തമാക്കി.
ബിജെപി സംസ്ഥാന നേതൃത്വവുമായി ഇടഞ്ഞുനില്‍ക്കുന്ന ബിഡിജെഎസ് പ്രതിഷേധസൂചകമായി അരൂര്‍ സീറ്റില്‍ മല്‍സരിക്കാന്‍ സന്നദ്ധരായിരുന്നില്ല. ഇതേത്തുടര്‍ന്ന് അരൂര്‍ സീറ്റ് ബിജെപി ഏറ്റെടുക്കുകയും, യുവമോര്‍ച്ച സംസ്ഥാന അധ്യക്ഷന്‍ പ്രകാശ് ബാബുവിനെ സ്ഥാനാര്‍ത്ഥിയാക്കുകയുമായിരുന്നു. സി ജി രാജഗോപാലാണ് എറണാകുളം മണ്ഡലത്തിലെ എന്‍ഡിഎ സ്ഥാനാര്‍ത്ഥി.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ