കൊച്ചി : നഗരസഭ അധികൃതരും എക്‌സൈസും പരിശോധനയ്ക്ക് എത്തിയപ്പോള്‍, റോഡരികിലെ ഷെഡിന്റെ അകത്ത് കട്ടിലില്‍ കിടന്നിരുന്ന സ്ത്രീവേഷമണിഞ്ഞ പുരുഷന്‍ ഇറങ്ങിയോടി. അമ്പരന്ന ഉദ്യോഗസ്ഥര്‍ പിന്നാലെ പാഞ്ഞെങ്കിലും പിടികൂടാനായില്ല. കൊച്ചി ആലുവയിലാണ് സംഭവം.
ആലുവ പാലസ് റോഡില്‍ വനിതാ കോളജിനും ഹയര്‍ സെക്കന്‍ഡറി സ്‌കൂളിനും തൊട്ടടുത്തുള്ള ഷെഡിലാണ് എക്‌സൈസും നഗരസഭ അധികൃതരും സംയുക്ത പരിശോധനക്കെത്തിയത്. റോഡ് പുറമ്പോക്കിലാണ് ഷെഡ്. ഷെഡിന്റെ മുന്‍ഭാഗം പൂട്ടിയിരുന്നതിനാല്‍ പിറകിലൂടെയാണ് ഉദ്യോഗസ്ഥര്‍ എത്തിയത്. അവരെ കണ്ടപ്പോള്‍ അകത്തെ കട്ടിലില്‍ കിടന്നിരുന്ന, സ്ത്രീവേഷമണിഞ്ഞ പുരുഷന്‍ ഇറങ്ങിയോടുകയായിരുന്നു.
ഷെഡ് കേന്ദ്രീകരിച്ചു ലഹരിമരുന്നു കച്ചവടം നടക്കുന്നുവെന്ന പരാതിയെത്തുടര്‍ന്നായിരുന്നു അധികൃതര്‍ പരിശോധനക്കെത്തിയത്. ഇതിനു മുന്‍പില്‍ ഇരുന്നിരുന്ന ചെരുപ്പുകുത്തിയെ കുറച്ചുകാലമായി കാണാനില്ലാത്തതും സംശയത്തിനിടയാക്കിയിരുന്നു. അന്വേഷണത്തില്‍ ഇയാള്‍ ലഹരിമരുന്ന് കേസില്‍ പിടിക്കപ്പെട്ട് ജയിലിലാണെന്നു വിവരം ലഭിച്ചതായി എക്‌സൈസ് അധികൃതര്‍ പറഞ്ഞു.
പരിശോധനയില്‍ ഷെഡില്‍ നിന്നും ആയുധങ്ങളും സ്ത്രീകളുടെയും പുരുഷന്മാരുടെയും വസ്ത്രങ്ങളും കണ്ടെടുത്തു. ഈ ഭാഗത്തു രാത്രി ഇരുചക്രവാഹനങ്ങളിലും കാല്‍നടയായും ഒറ്റയ്ക്ക് സഞ്ചരിക്കുന്നവരെ തടഞ്ഞു പണം തട്ടിയ സംഭവങ്ങള്‍ ഉണ്ടായിട്ടുണ്ട്.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ