തിരുവനന്തപുരം : സംസ്ഥാനത്ത് കനത്ത മഴ. തെക്കന്‍ കേരളത്തിലും മധ്യകേരളത്തിലും ഇന്നലെ രാത്രി മുതല്‍ കനത്ത മഴ തുടരുകയാണ്. ഉച്ചയ്ക്ക് ശേഷവും കനത്ത മഴ തുടരുമെന്നാണ് കാലാവസ്ഥ വകുപ്പിന്റെ പ്രവചനം. കനത്ത മഴ തുടരുന്ന സാഹചരത്തില്‍ സംസ്ഥാനത്തെ 12 ജില്ലകളില്‍ ഓറഞ്ച് അലര്‍ട്ട് പ്രഖ്യാപിച്ചു. കണ്ണൂരും കാസര്‍കോടും ഒഴികെയുള്ള എല്ലാ ജില്ലകളിലുമാണ് ഓറഞ്ച് അലര്‍ട്ട് പ്രഖ്യാപിച്ചിട്ടുള്ളത്. കണ്ണൂര്‍, കാസര്‍കോട് ജില്ലകളില്‍ യെല്ലോ അലര്‍ട്ടും പുറപ്പെടുവിച്ചിട്ടുണ്ട്.

സംസ്ഥാനത്ത് നാളെ 13 ജില്ലകളില്‍ ഓറഞ്ച് അലര്‍ട്ട് പ്രഖ്യാപിച്ചിട്ടുണ്ട്. തിരുവനന്തപുരത്ത് മാത്രമാണ് നാളെ അതിതീവ്ര മഴ ഉണ്ടാകില്ലെന്ന് അറിയിപ്പുള്ളത്. മറ്റന്നാള്‍ ( ബുധനാഴ്ച) കോട്ടയം മുതല്‍ കാസര്‍കോട് വരെ പത്തുജില്ലകളിലും ഓറഞ്ച് അലര്‍ട്ടുണ്ട്. കനത്ത മഴയ്ക്ക് പുറമെ ശക്തമായ കാറ്റിനും ഇടിമിന്നലിനും സാധ്യതയുണ്ടെന്നും മുന്നറിയിപ്പ് നല്‍കിയിട്ടുണ്ട്.

കനത്ത മഴയും കാറ്റും ഉള്ള സാഹചര്യത്തില്‍ മല്‍സ്യത്തൊഴിലാളികല്‍ കടലില്‍ പോകരുതെന്ന് കാലാവസ്ഥ വകുപ്പ് നിര്‍ദേശം നല്‍കി. കനത്ത മഴ തുടരുന്ന സാഹചര്യത്തില്‍ ചീഫ് സെക്രട്ടറി ഉന്നതതലയോഗം വിളിച്ചു. തിരുവനന്തപുരത്ത് ഉച്ചയ്ക്ക് ശേഷമാണ് യോഗം. സംസ്ഥാനത്തെ സ്ഥിതിഗതികള്‍ യോഗം വിലയിരുത്തും.