തിരുവനന്തപുരം; കൈക്കൂലി വാങ്ങുന്നതിനിടെ തിരുവനന്തപുരം നഗരസഭാ ഉദ്യോഗസ്ഥ അറസ്റ്റില്. നഗരസഭയിലെ ജൂനിയര് ഹെല്ത്ത് ഇന്സ്പെക്ടറായ സരിതയാണ് വിജിലന്സിന്റെ പിടിയിലായത്. ഗള്ഫില് ജോലി ചെയ്യുന്ന തിരുവനന്തപുരം സ്വദേശി ഷിബുകുമാറിന്റെ പരാതിയിലാണ് വിജിലന്സ് സരിതയെ തന്ത്രപൂര്വം കുടുക്കിയത്.
വഴുതക്കാട് തുടങ്ങാനിരിക്കുന്ന ഇന്റീരിയര് ഡെക്കറേഷന് സ്ഥാപനത്തിന്റെ ലൈസന്സ് ആവശ്യത്തിനായി ഷിബു കുമാര് സരിതയെ സമീപിച്ചിരുന്നു. എന്നാല് 5000 രൂപ കൈക്കൂലി നല്കിയാല് മാത്രമേ ലൈസന്സ് നല്കൂ എന്നായിരുന്നു സരിതയുടെ നിലപാട്. ഇതോടെയാണ് ഷിബു വിജിലന്സില് പരാതി നല്കിയത്.
ഷിബു നല്കിയ വിവരങ്ങളുടെ അടിസ്ഥാനത്തില് വിജിലന്സ് ദക്ഷിണമേഖല ഡിവൈഎസ്പി അനിലിന്റെ നേതൃത്വത്തിലുള്ള സംഘം കെണി ഒരുക്കിയാണ് സരിതയെ പിടികൂടിയത്. റോഡില് വച്ച് പണം കൈമാറുന്നതിനിടെയാണ് സരിത പിടിയിലായത്. സരിതയെ തിരുവനന്തപുരം വിജിലന്സ് കോടതിയില് ഹാജരാക്കും.
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ