കൊച്ചി: ഗര്‍ഭിണിയായ യുവതിയുടേയും ശിശുവിന്റേയും ആരോഗ്യസ്ഥിതി പരിഗണിച്ച് 20 ആഴ്ച പിന്നിട്ട ഗര്‍ഭം അലസിപ്പിക്കാന്‍ ഹൈക്കോടതി യുവതിക്ക് അനുമതി നല്‍കി. 1971ലെ നിയമപ്രകാരം 20 ആഴ്ച പിന്നിട്ട് കഴിഞ്ഞാല്‍ ഗര്‍ഭം അലസിപ്പിക്കാന്‍ അനുവാദം നല്‍കാറില്ല. 

ഗര്‍ഭസ്ഥ ശിശുവിന്റെ തല അമിതമായി വളരുന്നുണ്ടെന്ന ഡോക്ടര്‍മാരുടെ വിലയിരുത്തലിനെ തുടര്‍ന്നാണ് ഹൈക്കോടതി സിംഗിള്‍ ബെഞ്ചിന്റെ ഉത്തരവ്. കൊല്ലം സ്വദേശിയായ 37കാരിയാണ് കോടതിയെ സമീപിച്ചത്. എന്നാല്‍, ഈ സമയം ഗര്‍ഭം അലസിപ്പിക്കുന്നത് യുവതിയുടെ ജീവന് ഭീഷണിയാണെന്ന അഞ്ചംഗ മെഡിക്കല്‍ ബോര്‍ഡിന്റെ റിപ്പോര്‍ട്ടാണ് സര്‍ക്കാര്‍ കോടതിയില്‍ സമര്‍പ്പിച്ചത്. 

പക്ഷേ, ഗര്‍ഭം അലസിപ്പിക്കണം എന്ന നിലപാടില്‍ ഹര്‍ജിക്കാരിയും ഭര്‍ത്താവും ഉറച്ചു നിന്നു. ഇതോടെ, ഗര്‍ഭം അലസിപ്പിക്കുന്നത് മൂലമുണ്ടാവുന്ന അപകട സാധ്യത സ്വയം നേരിടണം എന്ന് നിര്‍ദേശിച്ച് തിരുവനന്തപുരം മെഡിക്കല്‍ കോളെജില്‍ ഗര്‍ഭം അലസിപ്പിക്കാന്‍ കോടതി അനുമതി നല്‍കി.