തിരുവനന്തപുരം: കോവിഡ് പ്രതിരോധ പ്രവര്‍ത്തനങ്ങള്‍ക്കു മാത്രമായി മുഖ്യമന്ത്രിയുടെ ദുരിതാശ്വാസനിധിലേക്കു ലഭിച്ച വരുമാനത്തിന്റെ കണക്കുകള്‍ പുറത്തുവിട്ട് മുഖ്യമന്ത്രി പിണറായി വിജയന്‍. മാര്‍ച്ച് 27നുശേഷം 190 കോടി രൂപയോളം അക്കൗണ്ടിലെത്തിയതായി മുഖ്യമന്ത്രി അറിയിച്ചു.

സംഭാവനകളുടെ വിവരങ്ങള്‍ വെബ്‌സൈറ്റില്‍ അപ്‌ലോഡ് ചെയ്യുമെന്ന് മുഖ്യമന്ത്രി പറഞ്ഞു. ദുരിതാനാശ്വസനിധിയിലേക്കു ലഭിച്ച പണത്തിന്റെ വിശദാംശങ്ങള്‍ https://donation.cmdrf.kerala.gov.in/ എന്ന വെബ്‌സൈറ്റില്‍ ലഭ്യമാണ്.

കൊറോണ പ്രതിരോധത്തിന്റെ ഭാഗമായി സാധാരണ വഴികള്‍ അടയ്ക്കുന്നുണ്ട്. അടിയന്തര ആവശ്യങ്ങള്‍ക്കായി പോലും ജനങ്ങള്‍ക്കു പുറത്തിറങ്ങാന്‍ സാധിക്കാത്ത സ്ഥിതി റെഡ് സോണായി പ്രഖ്യാപിച്ച ജില്ലകളിലും ഹോട്‌സ്‌പോട്ടുകളിലുമുണ്ട്. ഇത് ഏതെങ്കിലും ഒരിടത്ത് ഒരു ഉദ്യോഗസ്ഥന്‍ നടപ്പാക്കുന്നതല്ല, നിയന്ത്രണങ്ങള്‍ കര്‍ശനമാക്കുന്നതിന്റെ ഭാഗമായി നടപ്പാക്കുകയാണ്. അതുകൊണ്ടാണു വീടുകളിലേക്കുള്ള സാധനങ്ങള്‍ ഹോം ഡെലിവറി ആയി എത്തിക്കുമെന്നു നേരത്തേ അറിയിച്ചത്. അത്തരം കാര്യങ്ങള്‍ ഫലപ്രദമായി നടപ്പിലാക്കണം. ഇതിന് പൊലീസിന്റെ സഹായവും ഉണ്ടാകും- മുഖ്യമന്ത്രി പറഞ്ഞു.