തിരുവനന്തപുരം : ഹര്‍ത്താല്‍ ദിവസമായ ഡിസംബര്‍ 17 ന് സാങ്കേതിക സര്‍വകലാശാല ( കെടിയു) നടത്തിയ റെഗുലര്‍, സപ്ലിമെന്ററി പരീക്ഷകള്‍ മാര്‍ച്ച് രണ്ടിന് വീണ്ടും നടത്തും. മിക്ക കോളജുകളിലും കുട്ടികള്‍ക്ക് എത്തിച്ചേരാന്‍ സാധിക്കാതിരുന്നത് കണക്കിലെടുത്താണ് പുനഃപരീക്ഷ നടത്താന്‍ അധികൃതര്‍ തീരുമാനിച്ചത്.

പുനഃപരീക്ഷയ്ക്കായി ഈ മാസം 20 മുതല്‍ 24 വരെ രജിസ്റ്റര്‍ ചെയ്യാം. ഡിസംബര്‍ 17 ന് പരീക്ഷ എഴുതിയവര്‍ക്കും വേണമെങ്കില്‍ അതു റദ്ദാക്കി വീണ്ടും എഴുതാം. പുനഃപരീക്ഷയ്ക്ക് രജിസ്റ്റര്‍ ചെയ്യുന്നവരുടെ ഡിസംബര്‍ പരീക്ഷയുടെ രജിസ്‌ട്രേഷന്‍ അസാധുവാകും.

അവരുടെ ഉത്തരക്കടലാസുകള്‍ നോക്കില്ല. എന്നാല്‍ പുനഃപരീക്ഷയ്ക്ക് രജിസ്റ്റര്‍ ചെയ്യാത്തവരുടെ ഉത്തരക്കടലാസുകള്‍ മൂല്യനിര്‍ണയം നടത്തുമെന്നും അധികൃതര്‍ അറിയിച്ചു.