കൊച്ചി: കൊച്ചിയില്‍ കോവിഡ് 19 സാമൂഹ്യവ്യാപനമില്ലെന്ന് എറണാകുളം ജില്ലാ കലക്ടര്‍ എസ് സുഹാസ്. ട്രിപ്പിള്‍ ലോക്ക്ഡൗണ്‍ ഏര്‍പ്പെടുത്തേണ്ട സാഹചര്യമില്ല. രോഗലക്ഷണം പ്രകടിപ്പിക്കുന്നവര്‍ക്ക് ആന്റിജന്‍ ടെസ്റ്റ് നടത്തുമെന്നും കലക്ടര്‍ വ്യക്തമാക്കി.
കൊച്ചിയില്‍ ഇന്നലെ ഉറവിടമറിയാത്ത ആറ് പേര്‍ക്കാണ് സമ്പര്‍ക്കത്തിലൂടെ രോഗം സ്ഥിരീകരിച്ചത്. സ്ഥിതി തുടര്‍ന്നാല്‍ ട്രിപ്പിള്‍ ലോക്ക്ഡൗണ്‍ ഏര്‍പ്പെടുത്തേണ്ടിവരുമെന്ന് സിറ്റി പൊലീസ് കമ്മീഷ്ണര്‍ വിജയ് സാഖറെ കഴിഞ്ഞദിവസം പറഞ്ഞിരുന്നു.
നിരീക്ഷണം ശക്തമാക്കുന്നതിന്റെ ഭാഗമായി കൊച്ചി നഗരത്തില്‍ ഇന്ന് രാവിലെ മുതല്‍ കര്‍ശന പരിശോധന ആരംഭിച്ചു. നഗരത്തില്‍ നിയന്ത്രിത മേഖലകളായി പ്രഖ്യാപിച്ചിരിക്കുന്ന സ്ഥലങ്ങളില്‍ റോഡുകള്‍ അടച്ചു.
അഞ്ച് ഡിവിഷനുകളില്‍ ഒരു എക്‌സിറ്റ്, എന്‍ട്രി പോയിന്റ് മാത്രമേ ഉണ്ടായിരിക്കുകയുള്ളു. നിയന്ത്രണം ലംഘിക്കുന്നവര്‍ക്കെതിരെ കര്‍ശന നടപടി സ്വീകരിക്കാനാണ് തീരുമാനം. ഇന്നലെ സമ്പര്‍ക്കത്തിലൂടെ രോഗബാധ ഉണ്ടായവരില്‍ കൊച്ചിയില്‍ സ്വകാര്യ ആശുപത്രികളില്‍ പ്രവേശിപ്പിച്ചിരുന്ന നാലുപേര്‍ ഉള്‍പ്പെടും. ആലുവയില്‍ കോവിഡ് സ്ഥിരീകരിച്ച ഓട്ടോ ഡ്രൈവറാണ് മറ്റൊരാള്‍.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ