തിരുവനന്തപുരം: ഗള്‍ഫില്‍ ആശങ്ക വര്‍ധിപ്പിച്ച് കോവിഡ് വ്യാപനം തുടരുന്നു. പ്രവാസികള്‍ ഏറ്റവുമധികം ആശ്രയിക്കുന്ന ഗള്‍ഫ് മേഖലയില്‍ കോവിഡ് ബാധിച്ച് മരിച്ച മലയാളികളുടെ എണ്ണം 150 ആയി. കുവൈത്തില്‍ ഒരു മലയാളി കൂടി മരിച്ചതോടെയാണ് ആശങ്ക വര്‍ധിപ്പിക്കുന്ന കോവിഡ് കണക്ക്.

പത്തനംതിട്ട വല്ലന സ്വദേശി പവിത്രന്‍ ദാമോദരന്‍( 52) ആണ് കോവിഡ് ബാധിച്ച് മരിച്ച 150-ാമത്തെ മലയാളി. ഇന്നലെയും കുവൈത്തില്‍ കോവിഡ് ബാധിച്ച് ഒരു മലയാളി മരിച്ചിരുന്നു. വടകര ലോകനാര്‍കാവ് സ്വദേശി കോമള്ളി ശ്രീ പത്മത്തില്‍ അജയന്‍ (48) ആണ് മരിച്ചത്. കോവിഡ് വൈറസ് ബാധയെ തുടര്‍ന്ന്  മിഷ്‌രിഫിലെ ഫീല്‍ഡ് ആശുപത്രിയില്‍ ചികിത്സയിലായിരുന്നു. ബാര്‍ബറായിരുന്നു.

കേരളത്തില്‍ ഇതുവരെ ഒന്‍പത് പേര്‍ക്കാണ് കോവിഡ് ബാധയെ തുടര്‍ന്ന് ജീവന്‍ നഷ്ടമായത്. 624 പേരാണ് സംസ്ഥാനത്ത് കൊറോണ വൈറസ് ബാധയെ തുടര്‍ന്ന് ചികിത്സയില്‍ കഴിയുന്നത്. ഇതുവരെ 575 പേരാണ് രോഗമുക്തി നേടിയത്.