കൊച്ചി; പാറമടയിൽ മുങ്ങിമരിച്ച അതിഥി തൊഴിലാളിക്കു കോവിഡ് സ്ഥിരീകരിച്ചതോടെ മൃതദേഹം ഏറ്റെടുത്ത് സംസ്കാരം നടത്തി പഞ്ചായത്ത് അം​ഗം. മരിച്ച ബിഹാർ സ്വദേശി രാജു കുമാർ സാഹയുടെ സംസ്കാരം നടത്താനായാണ് തിരുവാണിയൂർ പഞ്ചായത്ത് സ്ഥിരം സമിതി അധ്യക്ഷൻ കെ.വി. സനീഷ് നേരിട്ടിറങ്ങിയത്. 

കഴിഞ്ഞ ശനിയാഴ്ച ശാസ്താംമുകളിലെ പാറമടയിലാണ് രാജു മുങ്ങിമരിച്ചത്. തുടർന്നു നടത്തിയ പരിശോധനയിലാണ് കോവിഡ് സ്ഥിരീകരിച്ചത്. ഭാര്യയും 3, 6 വയസ്സുള്ള കുട്ടികളുമുള്ള രാജുവിന്റെ മറ്റു ബന്ധുക്കളാരും കേരളത്തിൽ ഇല്ലാത്തതിനാലാണു  സനീഷ് സംസ്കാരത്തിന്റെ ഉത്തരവാദിത്തം ഏറ്റെടുത്തത്. തിരുവാണിയൂർ പൊതുശ്മശാനത്തിലായിരുന്നു കോവിഡ് പ്രോട്ടോക്കോൾ പാലിച്ചു സംസ്കാരം.