കൊച്ചി; കോവിഡ് പോസിറ്റീവായ വിവരം മറച്ചുവച്ച് വിമാനയാത്രയ്ക്കെത്തിയ യുവതിയെ വിമാനത്താവളത്തിൽ തടഞ്ഞു. പുണെയിൽ വിദ്യാർഥിനിയായ യുവതിയാണ് ഇന്നലെ ആരോഗ്യ പ്രവർത്തകരുടെ നിർദേശം അവഗണിച്ച് നെടുമ്പാശ്ശേരി വിമാനത്താവളത്തിൽ എത്തിയത്. തുടർന്ന് സിഐഎസ്എഫിന്റെ സഹായത്തോടെ ആരോഗ്യ വകുപ്പ് അധികൃതർ തടയുകയായിരുന്നു. 

പരിശോധനാ ഫലം മറച്ചു വച്ചു യുവതി യാത്രക്ക് ഒരുങ്ങുകയായിരുന്നു. ആരോഗ്യ പ്രവർത്തകർ ഇക്കാര്യം നേരത്തെ അറിഞ്ഞതിനാൽ വിമാനത്താവള കവാടത്തിൽ തന്നെ ഇവരെ തടയാനായി.  ഏതാനും ദിവസങ്ങളിലായി 6 പേരെ ഇത്തരത്തിൽ പിടികൂടിയിരുന്നു. കോവിഡ് വ്യാപനം വർധിക്കുന്ന പശ്ചാത്തലത്തിൽ പൊതുജനങ്ങൾ ജാഗ്രതാ നിർദേശങ്ങൾ പാലിക്കാതെ വന്നാൽ സ്ഥിതിഗതികൾ കൂടുതൽ ഗുരുതരമാകുമെന്നു ജില്ലാ മെഡിക്കൽ ഓഫിസർ അറിയിച്ചു.