തിരുവനന്തപുരം: പ്രധാനമന്ത്രി ഗരീബ് കല്യാൺ അന്നയോജന (പിഎംജികെവൈ) പ്രകാരമുള്ള കേന്ദ്ര സർക്കാരിന്റെ മേയ് മാസത്തെ സൗജന്യ റേഷൻ വിതരണം ഇന്ന് ആരംഭിക്കും. മഞ്ഞ (എഎവൈ), പിങ്ക് (പിഎച്ച്എച്ച് ) റേഷൻ കാർഡുകൾക്ക് നാല് കിലോ അരിയും ഒരു കിലോ ഗോതമ്പുമാണു നൽകുക. 

രണ്ട് മാസത്തേക്കാണ് കേന്ദ്രസർക്കാർ സൗജന്യ റേഷൻ പ്രഖ്യാപിച്ചിരിക്കുന്നത്. ലോക്ഡൗണിൽ വ്യാപാര സ്ഥാപനങ്ങൾക്കുള്ള നിശ്ചിത സമയപരിധിയിൽ നിന്നു റേഷൻ കടകളെ ഒഴിവാക്കണമെന്ന് കേന്ദ്രം നിർദേശിച്ചിട്ടുണ്ട്. ആഴ്ചയിൽ എല്ലാ ദിവസവും റേഷൻ കടകൾ തുറന്നു പ്രവർത്തിക്കാൻ അനുവദിക്കണമെന്നാണ് സംസ്ഥാനങ്ങൾക്കുള്ള നിർദേശം. 

അതേസമയം കോവിഡ് ബാധിച്ച് മരിച്ച റേഷൻ വ്യാപാരികളോടുള്ള ആദരസൂചകമായും സർക്കാരിന്റെ അവഗണനയിൽ പ്രതിഷേധിച്ചും ഇന്നു റേഷൻ കടകൾ അടച്ചിടുമെന്നു റേഷൻ വ്യാപാരി സംഘടനകളുടെ സംയുക്ത കോഓർഡിനേഷൻ കമ്മിറ്റി അറിയിച്ചു. മുന്നൂറോളം വ്യാപാരികൾ ആശുപത്രികളിൽ‌ ചികിത്സയിലും അഞ്ഞൂറിൽപരം സെയിൽസ്മാന്മാരും ബന്ധുക്കളും ക്വാറന്റീനിലും കഴിയുകയാണെന്നു സംഘടനാനേതാക്കൾ അറിയിച്ചു. 

റേഷൻ വ്യാപാരികളെ മുന്നണിപ്പോരാളികളായി അംഗീകരിച്ച് അർഹമായ നഷ്ടപരിഹാരം നൽകണമെന്നും എല്ലാ വ്യാപാരികൾക്കും വാക്സിനേഷനും ആരോഗ്യ ഇൻഷുറൻസും, 8 മാസത്തെ കിറ്റിന്റെ കമ്മിഷൻ കുടിശിക തുടങ്ങിയ ആവശ്യങ്ങൾ ഉന്നയിച്ചാണു കടയടപ്പു സമരം. മണ്ണെണ്ണയും കിറ്റും റേഷനും വാങ്ങാൻ പല തവണ കാർഡ് ഉടമകൾ റേഷൻ കടയിൽ വരുന്ന സാഹചര്യം ഒഴിവാക്കണമെന്നും ഇവർ ആവശ്യപ്പെട്ടു.