കൊച്ചി: നിയമസഭാ തെരഞ്ഞെടുപ്പിലെ പരാജയത്തെക്കുറിച്ച് പഠിച്ചശേഷം ആദ്യമായി ബിജെപി സംസ്ഥാന കോർ കമ്മിറ്റി ഇന്നു ചേരും. കേരളത്തിൽ ബിജെപിയുടെ സംഘടനാച്ചുമതലയുള്ള സി പി രാധാകൃഷ്ണന്റെ സാന്നിധ്യത്തിൽ നെടുമ്പാശേരിയിൽ വച്ചാണ് യോ​ഗം. സംസ്ഥാന ജനറൽ സെക്രട്ടറിമാർ തയാറാക്കിയ റിപ്പോർട്ട് ചർച്ചചെയ്യലാണ് യോഗത്തിന്റെ പ്രധാന അജൻഡ. 

പ്രാദേശിക നേതാക്കളുടെ അഭിപ്രായം കേട്ടു ജനറൽ സെക്രട്ടറിമാരുടെ നേതൃത്വത്തിലുള്ള 4 സംഘങ്ങൾ തയാറാക്കിയ റിപ്പോർട്ടാണു യോഗത്തിനു മുന്നിലെത്തുക. ചർച്ചയ്ക്കു ശേഷം റിപ്പോർട്ട് ദേശീയ നേതൃത്വത്തിനു കൈമാറും. സംസ്ഥാന പ്രസിഡന്റ് കെ സുരേന്ദ്രൻ, കേന്ദ്രമന്ത്രി വി മുരളീധരൻ, കുമ്മനം രാജശേഖരൻ, ഒ രാജഗോപാൽ, മുൻ സംസ്ഥാന അധ്യക്ഷന്മാർ, ജനറൽ സെക്രട്ടറിമാർ തുടങ്ങിയവർ കോർ കമ്മിറ്റിയിൽ പങ്കെടുക്കും.

സ്ഥാനാർഥി നിർണയത്തിലെ പ്രശ്നങ്ങൾ, തെരഞ്ഞെടുപ്പു പ്രവർത്തനത്തിലെ ഏകോപനമില്ലായ്മ തുടങ്ങിയ വിഷയങ്ങളിൽ സംസ്ഥാന നേതൃത്വത്തിനെതിരെ പ്രാദേശിക യോഗങ്ങളിൽ വിമർശനം ഉയർന്നിരുന്നു. സംസ്ഥാന പ്രസിഡന്റ് കെ സുരേന്ദ്രനെതുരെയുള്ള ആരോപണങ്ങളും ഇന്ന് ചർച്ചയാകാൻ സാധ്യതയുണ്ട്. നേതൃമാറ്റമടക്കമുള്ള പതിവ് ആവശ്യവും ഉയർന്നേക്കും.