മക്കാവു: തെക്കന്‍ ചൈനയിലും ഹോങ്കോങ്ങിലും ശക്തമായ ചുഴലിക്കാറ്റില്‍ 16 മരണം. പ്രാദേശിക സമയം ബുധനാഴ്ച രാവിലെ വീശിത്തുടങ്ങിയ ചുഴലിക്കാറ്റില്‍ കനത്ത നാശനഷ്ടങ്ങളുണ്ടായി. 27,000 പേരെ പുനരധിവാസകേന്ദ്രങ്ങളിലേക്കു മാറ്റിയിരിക്കുകയാണ്.

ശക്തമായ കാറ്റില്‍ ജനങ്ങളും വാഹനങ്ങളും കെട്ടിടങ്ങളുമെല്ലാം പറന്നുപോകുന്നതിന്റെ ഭീതികരമായ ദൃശ്യങ്ങള്‍ സമൂഹമാധ്യമങ്ങളില്‍ പ്രചരിക്കുന്നുണ്ട്.

മണിക്കൂറില്‍ 200 കിലോ മീറ്റര്‍ വേഗതയിലാണ് കാറ്റു വീശിയത്. കാറ്റിനൊപ്പം ശക്തമായ മഴയുമുണ്ട്. ഇപ്പോള്‍ നഗരത്തിന്റെ പകുതിയിലധികം ഭാഗം വെള്ളത്തിലായ അവസ്ഥയിലാണ്. 

കഴിഞ്ഞ 20 വര്‍ഷത്തിനിടെയുണ്ടായ ഏറ്റവും ശക്തമായ കാറ്റാണ് ഹാറ്റോയെന്ന് രാജ്യാന്തര വാര്‍ത്ത ഏജന്‍സികള്‍ റിപ്പോര്‍ട്ട് ചെയ്തു. തെക്കന്‍ ചൈന, ഹോങ്കോങ്, മക്കാവൂ തീരങ്ങളിലാണ് ഹാറ്റോ വീശിയടിച്ചത്.