ലണ്ടന്‍: മാഞ്ചസ്റ്ററില്‍ 22പേരുടെ ജീവനെടുത്ത ഭീകരാക്രമണം നടത്തിയ ചാവേറിന്റെ ചിത്രങ്ങള്‍ പുറത്തുവിട്ട് അന്വേഷണ ഏജന്‍സികള്‍. അക്രമണം നടത്തിയെന്ന് സംശയിക്കുന്ന സല്‍മാന്‍ ആബിദിയുടെ ചിത്രമാണ് പുറത്തുവിട്ടിരിക്കുന്നത്. കറുത്ത ജാക്കറ്റും ബേസ്‌ബോള്‍ തൊപ്പിയും ജീന്‍സും കണ്ണടയും ധരിച്ച സല്‍മാന്റെ ചിത്രങ്ങളാണ് പുറത്തുവിട്ടിരിക്കുന്നത്. അക്രമത്തിന് മുമ്പ് സിസി ടിവിയില്‍ പതിഞ്ഞ ചിത്രങ്ങളാണ് ചാവേറിനെ തിരിച്ചറിയാന്‍ സഹായമായത്.

സല്‍മാന്‍ ആബിദിയുടെ സഹോദരന്‍ അടക്കം 11പേര്‍ ഇപ്പോള്‍ ലണ്ടന്‍ അന്വേഷണസംഘത്തിന്റെ കസ്റ്റഡിയിലാണ്. മാഞ്ചസ്റ്റരില്‍ ജനിച്ച ആബിദിയുടെ മാതാപിതാക്കള്‍ ലിബിയക്കാരാണ്. ലിബിയയിലായിരുന്ന ആബിദി മെയ് 18നാണ് ബ്രിട്ടണിലെത്തിയത്. 

അമേരിക്കന്‍ പോപ് ഗായിക അരീന ഗ്രാന്റെയുടെ സംഗീത പരിപാടി കഴിഞ്ഞ് പുറത്തിറങ്ങിയവര്‍ക്ക് നേരെയാണ് ചാവേറാക്രമണമുണ്ടായത്. 119ഓളംപേര്‍ക്ക് പരിക്കേറ്റ അക്രമത്തില്‍ 22പേര്‍ മരിച്ചിരുന്നു.