ന്യൂയോർക്ക്: വിഖ്യാത അമേരിക്കൻ എഴുത്തുകാരി ടോണി മോറിസണ്‍ അന്തരിച്ചു. 88 വയസായിരുന്നു അവർക്ക്. മോറി‍സണിന്‍റെ പ്രസാധാകരായ നോഫ് ആണ് മരണ വാര്‍ത്ത ലോകത്തെ അറിയിച്ചത്. മരണ കാരണം എന്താണെന്ന് സ്ഥിരീകരിച്ചിട്ടില്ല.

1993ലെ സാഹിത്യത്തിനുള്ള നൊബേല്‍ പുരസ്‍കാരം, 1988ലെ സാഹിത്യത്തിനുള്ള പുലിറ്റ്‍സര്‍ പുരസ്‍കാരങ്ങൾ ടോണി മോറിസണ് ലഭിച്ചിട്ടുണ്ട്. ആഫ്രിക്കന്‍-അമേരിക്കന്‍ ജീവതങ്ങള്‍ ആധാരമാക്കി എഴുതിയ മോറിസണിന്‍റെ നോവലുകള്‍ ജീവിതത്തിന്റെ നേർക്കാഴ്‍ച്ചകളായിരുന്നു. ബിലവ്ഡ്‍, സോങ് ഓഫ് സോളമന്‍, സുല, ബ്ലൂവെസ്റ്റ് ഐ, എ മെഴ്സി, ഹോം, പാരഡൈസ് എന്നിവയാണ് പ്രധാനപ്പെട്ട കൃതികൾ.

1931 ഫെബ്രുവരി 18ന് അമേരിക്കയിലെ ഓഹിയോയിലുള്ള ലോറെയ്നിലാണ് ടോണി മോറിസൺ ജനിച്ചത്. 2012ല്‍ ടോണി മോറിസണ് അമേരിക്കയിലെ ഏറ്റവും വലിയ സിവിലിയന്‍ പുരസ്‍കാരമായ പ്രസിഡന്‍ഷ്യല്‍ മെഡല്‍ ഓഫ് ഫ്രീഡം പ്രസിഡന്‍റ് ബരാക്ക് ഒബാമ സമ്മാനിച്ചിരുന്നു.