വാഷിങ്ടണ്: ഇറാനെതിരെ പ്രകോപനവുമായി അമേരിക്കന് പ്രസിഡന്റ് ഡൊണള്ഡ് ട്രംപ് വീണ്ടും രംഗത്ത്. ഇറാന് ഒരുകാലത്തും ആണവായുധം ഉണ്ടാകില്ലെന്നാണ് അമേരിക്കന് പ്രസിഡന്റിന്റെ വെല്ലുവിളി. 2015ല് ഉണ്ടാക്കിയ ആണവ കരാറില് നിന്ന് ഇറാന് പിന്മാറിയിരുന്നു. ആവശ്യമനുസരിച്ച് യുറേനിയം സമ്പുഷ്ടീകരണം നടത്തുമെന്ന് ഇറാന് പ്രഖ്യാപിച്ചതിന് പിന്നാലെയാണ് ആണവായുധം ഉണ്ടാകില്ലെന്ന ട്രംപിന്റെ പ്രഖ്യാപനം.
IRAN WILL NEVER HAVE A NUCLEAR WEAPON!
— Donald J. Trump (@realDonaldTrump) January 6, 2020>
അതിനിടെ സൈന്യത്തെ പിന്വലിക്കണമെന്ന ഇറാക്ക് പാര്ലമെന്റിന്റെ ആവശ്യം ഡോണള്ഡ് ട്രംപ് തള്ളി. ഇറാക്കില് വ്യോമതാവളം നിര്മിക്കാന് വന്തുക ചെലവഴിച്ചിട്ടുുണ്ടെന്നും നഷ്ടപിഹാരം ലഭിക്കാതെ സൈന്യത്തെ പിന്വലിക്കില്ലെന്നും ട്രംപ് പറഞ്ഞു. ഇറാക്കിനെതിരെ ശക്തമായ ഉപരോധം ഏര്പ്പെടുത്തുമെന്ന് ട്രംപ് ഭീഷണിമുഴക്കുകയും ചെയ്തു.
അതേസമയം, കഴിഞ്ഞദിവസം, ഡ്രോണ് ആക്രമണത്തില് മരിച്ച ഇറാനിയന് രഹസ്യസേനാ തലവന് ഖാസിം സുലൈമാനിയുടെ മൃതദേഹം വഹിച്ചുകൊണ്ടുള്ള വിലാപയാത്രയില് ലക്ഷങ്ങളാണ് അണിനിരന്നത്. 'അമേരിക്കയിലേക്ക് മരണം' എന്ന മുദ്രാവാക്യമുയര്ത്തിയാണ് ഇവര് വിലാപയാത്ര നടത്തിയതെന്ന് രാജ്യന്തര മാധ്യമങ്ങള് റിപ്പോര്ട്ട് ചെയ്തു. ഇറാനിലെ ക്യോം ജാംകരന് മോസ്കിലെ താഴികക്കുടത്തില് ചുവപ്പു കൊടി ഉയര്ന്നത് യുദ്ധകാഹളമാണെന്നാണ് നിരീക്ഷകര് വിലയിരുത്തുന്നത്. പാരമ്പര്യമനുസരിച്ച് യുദ്ധം വരുന്നതിന്റെ സൂചനയാണിത്. ഇതിന് തൊട്ടുപിന്നാലെ ഇറാഖിലെ ബാഗ്ദാദില് അമേരിക്കന് എംബസിക്ക് സമീപം വന് സ്ഫോടനങ്ങള് ഉണ്ടായി.
സുലൈമാനിയുടെ വധത്തിന്റെ പേരില് ഇറാന്, അമേരിക്കയ്ക്ക് നേരെ ആക്രമണത്തിന് മുതിര്ന്നാല് കനത്ത തിരിച്ചടിയുണ്ടാകുമെന്ന് യുഎസ് പ്രസിഡന്റ് ഡൊണാള്ഡ് ട്രംപ് പറഞ്ഞു.
അമേരിക്കന് പൗരന്മാരെയോ, വസ്തുവകകളെയോ ഇറാന് ലക്ഷ്യം വെച്ചാല് പ്രത്യാഘാതം ഗുരുതരമാകുമെന്നാണ് ട്രംപിന്റെ മുന്നറിയിപ്പ്. ഇറാന്റെ തന്ത്രപ്രധാനമായ 52 കേന്ദ്രങ്ങള് അമേരിക്കയുടെ നിരീക്ഷണ വലയത്തിലാണ്. ഈ കേന്ദ്രങ്ങളില് അതിശക്തമായ ആക്രമണമാണ് ഉണ്ടാകുകയെന്ന് ട്രംപ് പറഞ്ഞു.
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ