ഷാർജ: ബഹുനില കെട്ടിടത്തിന് മുകളിൽ നിന്ന് ചാടിയ പ്രവാസി യുവതി മരിച്ചു. പൊലീസ് അറസ്റ്റ് ചെയ്യാനെത്തുന്നത് ഭയന്നാണ് യുവതി കെട്ടിടത്തിന്റെ മുകളിൽ നിന്ന് ചാടിയത്. 

യുഎഇ ഷാർജയിലെ അൽ മുറൈജ ഏരിയയിൽ ഞായറാഴ്ച രാത്രിയോടെയാണ് സംഭവം ഉണ്ടായതെന്ന് ഷാർജ പൊലീസ് അറിയിച്ചു. ഫിലിപ്പീൻസ് സ്വദേശിയായ യുവതിയാണ് മരിച്ചത്. ഇവർക്കൊപ്പം സുഹൃത്തായ അറബ് വംശജനും ഉണ്ടായിരുന്നു.

രാത്രി പന്ത്രണ്ട് മണിയോടെയാണ് 30കാരിയായ ഫിലിപ്പീൻസ് യുവതിയെ സുഹൃത്തെന്ന് കരുതുന്ന അറബ് വംശജനോടൊപ്പം ഷാർജയിലെ ഒരു ആളൊഴിഞ്ഞ അപ്പാർട്ട്‌മെന്റിൽ കണ്ടത്. അറബ് യുവാവിന്റെ ഉടമസ്ഥതയിലുള്ള അപ്പാർട്ട്‌മെന്റ് അല്ലായിരുന്നു അത്. അപ്പാർട്ട്‌മെന്റിലെ സെക്യൂരിറ്റി ഉദ്യോഗസ്ഥൻ ഇവരെ സ്ഥലത്ത് കണ്ടതോടെ കെട്ടിടത്തിൻറെ ഉടമസ്ഥനെ വിളിച്ച് അറിയിച്ചു. യുവതിയും അറബ് യുവാവും ഹുക്ക വലിക്കുന്നതായി കണ്ടതോടെ അപ്പാർട്ട്‌മെന്റിന്റെ ഉടമസ്ഥൻ പൊലീസിൽ വിവരമറിയിക്കുകയായിരുന്നു.

പൊലീസ് സ്ഥലത്തെത്തിയതോടെ അറസ്റ്റ് ഭയന്ന യുവതി അപ്പാർട്ട്‌മെന്റിന്റെ ആറാം നിലയിൽ നിന്ന് താഴേക്ക് ചാടി. ഗുരുതര പരിക്കേറ്റ യുവതി സംഭവസ്ഥലത്ത് തന്നെ മരിച്ചു.ചോദ്യം ചെയ്യാനായി അറബ് വംശജനെ പൊലീസ് അറസ്റ്റ് ചെയ്ത് കസ്റ്റഡിയിലെടുത്തു.