കളിച്ചത് മൂന്ന് ഇന്നിങ്‌സ്, രണ്ട് സെഞ്ചുറി, ഒരു അര്‍ധ സെഞ്ചുറി. 2011ലെ ലോകകപ്പ് ടീമില്‍ ഉള്‍പ്പെടുത്താതിരുന്നതിന്റെ സങ്കടമെല്ലാം ഇംഗ്ലണ്ടില്‍ തീര്‍ക്കുകയാണ് രോഹിത് ശര്‍മ ലക്ഷ്യം വയ്ക്കുന്നത്. പാകിസ്ഥാനെതിരെ 85 പന്തില്‍ നിന്ന് മൂന്നക്കം കടന്ന് ലോകകപ്പ് ആഘോഷിക്കുകയാണ് രോഹിത്. 

രോഹിത്തിന്റെ 24ാം ഏകദിന സെഞ്ചുറിയാണിത്. ലോകകപ്പില്‍ കോഹ് ലിക്ക് ശേഷം പാകിസ്ഥാനെതിരെ സെഞ്ചുറി നേടുന്ന താരവുമായി രോഹിത്. ഏകദിനത്തിലെ രോഹിത്തിന്റെ വേഗമേറിയ മൂന്നാമത്തെ സെഞ്ചുറിയാണിത്. 2017 ചാമ്പ്യന്‍സ് ട്രോഫി ഫൈനലില്‍ പാകിസ്ഥാനോട് 0ന് പുറത്തായതിന്റെ കണക്കും രോഹിത് ഇന്ന് തീര്‍ത്തു. ഡബിള്‍ സെഞ്ചുറിയിലേക്കാണോ രോഹിത്തിന്റെ കുതിപ്പെന്നാണ് ഇപ്പോള്‍ ആരാധകരുടെ സംശയം. 

ലോകകപ്പിലെ ആദ്യ മൂന്ന് ഇന്നിങ്‌സുകളില്‍ തുടര്‍ച്ചയായി അര്‍ധ ശതകം നേടുന്ന റെക്കോര്‍ഡില്‍ നവ്‌ജോദ് സിങ് സിദ്ധുവിനും സച്ചിനും, യുവരാജിനും ശേഷം ഈ നേട്ടം കൈവരിക്കുന്ന താരമായി രോഹിത്. 1987ലോകകപ്പിലാണ്  സിദ്ധു ഈ നേട്ടം കൊയ്തത്. 1996ല്‍ സച്ചിനും, 2011 ലോകകപ്പില്‍ യുവിയും ആദ്യ മൂന്ന് ഇന്നിങ്‌സില്‍ അര്‍ധ ശതകം പിന്നിട്ടിരുന്നു.