ന്യൂഡല്‍ഹി: രാജ്യത്ത് ബാലപീഡനം വര്‍ധിക്കുന്ന പശ്ചാത്തലത്തില്‍ ബാലപീഡകര്‍ക്ക് വധശിക്ഷ ഉറപ്പാക്കുന്ന ഓര്‍ഡിനന്‍സിന് കേന്ദ്രസര്‍ക്കാര്‍ അംഗീകാരം. പന്ത്രണ്ടു വയസില്‍ താഴെയുളള കുട്ടികളെ ബലാത്സംഗം ചെയ്യുന്നവര്‍ക്ക് വധശിക്ഷ ഉറപ്പാക്കുന്ന ഓര്‍ഡിനന്‍സിനാണ് കേന്ദ്രമന്ത്രിസഭ അംഗീകാരം നല്‍കിയത്. ഇതുമായി ബന്ധപ്പെട്ട് പോക്‌സോ നിയമത്തില്‍ കേന്ദ്രസര്‍ക്കാര്‍ ഭേദഗതി വരുത്തി. രാഷ്ട്രപതി ഇത് അംഗീകരിക്കുന്നതോടെ നിയമം പ്രാബല്യത്തില്‍ വരും.
അടുത്തിടെ കത്തുവയില്‍ എട്ടുവയസുകാരിയെ പീഡിപ്പിച്ച കൊന്നത് രാജ്യ വ്യാപകമായ പ്രക്ഷോഭത്തിന് ഇടയാക്കിയിരുന്നു. ബാലപീഡകര്‍ക്ക് എതിരെ ശക്തമായ നടപടി വേണമെന്ന ആവശ്യമാണ് മുഖ്യമായി ഉയര്‍ന്നത്. 12 വയസില്‍ താഴെ പ്രായമുളള കുട്ടികളെ പീഡിപ്പിക്കുന്നവര്‍ക്ക് വധശിക്ഷ ഉറപ്പാക്കണമെന്ന് വിവിധ നിയമവൃത്തങ്ങളും ആവശ്യപ്പെട്ടു. ഇതിന്റെ അടിസ്ഥാനത്തിലാണ് നടപടി. പോക്‌സോ കേസുകളില്‍ ഉടന്‍ തീര്‍പ്പുകല്‍പ്പിക്കുന്നതിന് അതിവേഗ കോടതി സ്ഥാപിക്കണമെന്ന ആവശ്യവും ഓര്‍ഡിനന്‍സില്‍ കേന്ദ്രസര്‍ക്കാര്‍ പരിഗണിച്ചതായാണ് വിവരം.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ