ന്യൂഡല്‍ഹി : മഹാത്മാഗാന്ധി ഘാതകനായ നാഥുറാം ഗോഡ്‌സെയെ രാജ്യസ്‌നേഹിയെന്ന് വാഴ്ത്തിയ പ്രജ്ഞാസിംഗ് ഠാക്കൂറിനെ തള്ളി പ്രധാനമന്ത്രി നരേന്ദ്രമോദി. ഗാന്ധിജിയെ അപമാനിച്ച പ്രജ്ഞാ സിംഗിനോട് പൊറുക്കാനാവില്ലെന്ന് മോദി പറഞ്ഞു. പ്രജ്ഞാ സിംഗിന് മാപ്പു നല്‍കാനാവില്ലെന്നും പ്രധാനമന്ത്രി പറഞ്ഞു.
ഗോഡ്‌സെയാണ് യഥാര്‍ത്ഥ രാജ്യസ്‌നേഹിയെന്ന് ഭോപ്പാലിലെ ബിജെപി സ്ഥാനാര്‍ത്ഥി കൂടിയായ പ്രജ്ഞാ സിംഗ് ഠാക്കൂര്‍ അഭിപ്രായപ്പെട്ടിരുന്നു. ഈ പ്രസ്താവന വിവാദമായതോടെ പ്രജ്ഞയെ തള്ളി ബിജെപി വക്താവ് രംഗത്തുവന്നിരുന്നു. തുടര്‍ന്ന് പ്രജ്ഞ മാപ്പു പറയുകയും ചെയ്തിരുന്നു.
പ്രജ്ഞാസിംഗിന്റെ വിവാദ പ്രസ്താവനയില്‍ വിശദീകരണം ചോദിക്കുമെന്ന് ബിജെപി ദേശീയ അധ്യക്ഷന്‍ അമിത്ഷായും വ്യക്തമാക്കിയിരുന്നു. അച്ചടക്ക സമിതി വിശദീകരണം പരിശോധിക്കും. തുടര്‍ന്ന് നടപടി എടുക്കുന്ന കാര്യത്തില്‍ തീരുമാനം കൈക്കൊള്ളുമെന്നും അമിത് ഷാ അറിയിച്ചു.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ