ലഖ്‌നൗ: ദീപാവലി ആഘോഷത്തിനിടെ കാണാതായ യുവതിയുടെ മൃതദേഹം ദുരൂഹസാഹചര്യത്തില്‍ പേരമരത്തോട്ടത്തില്‍ കണ്ടെത്തി. മൃതശരീരത്തിന് സമീപത്തു നിന്നും ലഭിച്ച ഹാന്‍ഡ് ബാഗില്‍ നിന്നും 85,000 രൂപയും കണ്ടെടുത്തിട്ടുണ്ട്. ഉത്തര്‍പ്രദേശിലെ ബദൗന്‍ ജില്ലയിലാണ് സംഭവം.
ഹാന്‍ഡ് ബാഗില്‍ പണത്തിന് പുറമെ, ആധാര്‍ കാര്‍ഡ്, സ്വര്‍ണാഭരണങ്ങള്‍, ബാങ്ക് പാസ്സ് ബുക്ക് തുടങ്ങിയവയുമുള്ളതായി പൊലീസ് വ്യക്തമാക്കി. വ്യാഴാഴ്ചയാണ് 21 കാരിയായ യുവതിയെ വീട്ടില്‍ നിന്നും കാണാതായത്. യുവതിയെ കഴുത്തു ഞെരിച്ച് കൊലപ്പെടുത്തിയതായാണ് പ്രാഥമിക വിലയിരുത്തല്‍.
വ്യാഴാഴ്ച രാത്രി ദീപാവലി ആഘോഷങ്ങള്‍ക്കിടെ യുവതിയെ കാണാതാകുകയായിരുന്നു എന്നാണ് യുവതിയുടെ പിതാവ് പൊലീസിനോട് പറഞ്ഞത്. എന്നാല്‍ വിവരം പൊലീസിനെ അറിയിച്ചില്ല. നാട്ടുകാര്‍ അറിയാതിരിക്കാന്‍ സ്വന്തം നിലയില്‍ അന്വേഷണം നടത്തിവരികയായിരുന്നു എന്നും പിതാവ് പറഞ്ഞു.
യുവതിയുടെ പിതാവ് സംശയം പറഞ്ഞ ഒരു യുവാവിനെ കേന്ദ്രീകരിച്ചാണ് അന്വേഷണം പുരോഗമിക്കുന്നത്. അതേസമയം ദുരഭിമാന കൊലയാണോ എന്നും പൊലീസ് പരിശോധിക്കുന്നുണ്ട്.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ