പൂനെ: മൂന്നു മാസം പ്രായമുള്ള കുഞ്ഞിനെ അമ്മ കഴുത്തുഞെരിച്ചു കൊന്നു. പതിമുന്നു വയസ്സു പ്രായമുള്ള മൂത്ത മകനെക്കൊണ്ടു കുഞ്ഞിന്റെ മൃതദേഹം മറവുചെയ്യിച്ച അമ്മയെ പൊലീസ് അറസ്റ്റ് ചെയ്തു. മൂത്ത മകനും പൊലീസിന്റെ കസ്റ്റഡിയിലാണ്.
പൂനെയ്ക്കു സമീപം യെര്‍വാഡയിലാണ് സംഭവം. ഭര്‍ത്താവുമായി പിരിഞ്ഞുകഴിയുന്ന സ്ത്രീ മറ്റൊരാളുമായി അടുപ്പത്തിലായിരുന്നുവെന്ന് പൊലീസ് പറഞ്ഞു. ഇവരുടെ അടുപ്പത്തിന്റെ കാര്യവും സ്ത്രീ ഗര്‍ഭിണിയാണെന്നതും നാട്ടുകാര്‍ക്കെല്ലാം അറിയാമായിരുന്നു. പ്രസവത്തിനു ശേഷം കുഞ്ഞിനെ കാണാതായതിനെത്തുടര്‍ന്നുള്ള സംശയമാണ് പൊലീസ് കേസില്‍ എത്തിയത്.
നാട്ടുകാര്‍ സംശയം ഉന്നയിച്ചതിനെത്തുടര്‍ന്ന് സ്ത്രീയുടെ മൂത്ത മകനെ പൊലീസ് ചോദ്യം ചെയ്യുകയായിരുന്നു. ഇതോടെ വിവരങ്ങള്‍ വെളിവായി. കുഞ്ഞിനെ അമ്മ കഴുത്തുഞെരിച്ചു കൊന്നെന്ന് മൂത്ത കുട്ടി വെളിപ്പെടുത്തി. അമ്മയുടെ നിര്‍ദേശപ്രകാരം താന്‍ മൃതദേഹം പുഴയോരത്തു കുഴിച്ചിട്ടതായും കുട്ടി പറഞ്ഞു.
പുഴയോരത്തു നടത്തിയ പരിശോധനയില്‍ പൊലീസ് മൃതദേഹം കണ്ടെടുത്തു. അന്വേഷണം തുടരുകയാണെന്ന് പൊലീസ് പറഞ്ഞു.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ