അടുത്ത അഞ്ച് വര്‍ഷത്തിനുള്ളില്‍ ഇന്ത്യ ഉള്‍പ്പെടെ അഞ്ച് രാജ്യങ്ങളില്‍ പറക്കും ടാക്‌സി അവതരിപ്പിക്കാന്‍ ഊബര്‍. ഇന്ത്യയ്ക്കുപുറമേ ജപ്പാന്‍, ഓസ്‌ട്രേലിയ, ബ്രസീല്‍, ഫ്രാന്‍സ് എന്നീ രാജ്യങ്ങളാണ് പറക്കും ടാക്‌സി അവതരിപ്പിക്കാന്‍ ഊബര്‍ തിരഞ്ഞെടുത്തിട്ടുള്ളത്.
മുംബൈ, ഡല്‍ഹി, ബംഗളൂരു തുടങ്ങിയ നഗരങ്ങളിലെ ഗതാഗത സാഹചര്യം കണക്കിലെടുത്താണ് ഇന്ത്യയെ പട്ടികയില്‍ ഉള്‍പ്പെടുത്തിയിട്ടുള്ളതെന്നാണ് റിപ്പോര്‍ട്ടുകള്‍. തിരഞ്ഞെടുത്തിട്ടുള്ള അഞ്ച് രാജ്യങ്ങളില്‍ ഏതെല്ലാം നഗരങ്ങളിലാണ് പറക്കും ടാക്‌സികള്‍ അവതരിപ്പിക്കുകയെന്ന് ആറ് മാസത്തിനുള്ളില്‍ പ്രഖ്യമാപിക്കുമെന്ന് ഊബര്‍ വൃത്തങ്ങള്‍ അറിയിച്ചു.
ഒരേ സമയം നാല് യാത്രികര്‍ക്ക് ഉപയോഗപ്പെടുത്താവുന്നവയാണ് പറക്കും ടാക്‌സികളെന്നും മണിക്കൂറില്‍ 200മൈല്‍ വേഗതയിലാണ് ഇവ സഞ്ചരിക്കുകയെന്നും മുമ്പ് അറിയിച്ചിരുന്നു. അമേരിക്കയിലെ ലോസ് ആഞ്ചലസിലും ഡാളസിലുമാണ് പറക്കും ടാക്‌സികള്‍ ആദ്യം അവതരിപ്പിക്കുകയെന്നാണ് കഴിഞ്ഞവര്‍ഷം കമ്പനി പുറത്തുവിട്ട വിവരം.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ