ടാറ്റാ ഗ്രൂപ്പ് ചെയർമാൻ എമിരറ്റസ് രത്തൻ ടാറ്റയ്ക്ക് നായ്ക്കളെന്നാൽ ഏറെ പ്രിയമാണ്. ടാറ്റാ ഗ്രൂപ്പിന്റെ സുരക്ഷാസംഘത്തിലുള്ള നായ്ക്കൾക്കായി പ്രത്യേക ആശുപത്രിയും സംരക്ഷണ കേന്ദ്രവും വരെ ​ഗ്രൂപ്പ് ഒരുക്കിയിട്ടുണ്ട്. ടാറ്റാ ഗ്രൂപ്പിന്റെ ആസ്ഥാനമായ ദക്ഷിണമുംബൈയിലെ ബോംബെ ഹൗസിലാകട്ടെ രത്തൻ ടാറ്റയുടെ നേതൃത്വത്തിൽ തെരുവുനായ്ക്കളെ സംരക്ഷിക്കുന്ന കേന്ദ്രവുമുണ്ട്. 

മോടിപിടിപ്പിക്കലിനുശേഷം 2018ൽ ബോംബെ ഹൗസ് തുറന്നതുമുതൽ തെരുവുനായ്ക്കൾക്കായുള്ള പ്രത്യേക കെന്നലും ഇ‌വിടെ പ്രവർത്തിക്കുന്നുണ്ട്. ഈ വർഷത്തെ രത്തൻ ടാറ്റയുടെ ദീപാവലി ഇവിടുത്തെ തെരുവുനായ്ക്കൾക്കൊപ്പമായിരുന്നു. ഏറ്റവും പ്രിയപ്പെട്ട ​ഗോവ എന്ന നായയ്ക്കൊപ്പം ഇരിക്കുന്ന ചിത്രം അദ്ദേഹം കഴിഞ്ഞ ദിവസം ഇൻസ്റ്റ​ഗ്രാമിൽ പങ്കുവയ്ക്കുകയുമുണ്ടായി. 

കറുപ്പും വെളുപ്പും നിറമാണ് ​ഗോവയ്ക്ക്. നായ്ക്കുട്ടിയെ ഗോവയിൽനിന്ന് തന്റെ ഒരു സുഹൃത്തിന് ലഭിച്ചതാണെന്നും അതിനാലാണ് ഗോവ എന്ന പേര് നൽകിയതെന്നും ഒരു കമന്റിന് മറുപടിയായി രത്തൻ ടാറ്റ കുറിച്ചു. എല്ലാ ദിവസവും രത്തൻ ടാറ്റ ഓഫീസിലെത്തുമ്പോൾ അദ്ദേഹത്തെ കാത്ത് ഗോവയുണ്ടാകും. ഗോവയ്ക്ക് പ്രത്യേക മുറിയും ബോംബെ ഹൗസിലുണ്ട്.