ബംഗളൂരു: ധോനിയുടെ പിന്‍ഗാമിയായി ഇന്ത്യന്‍ ക്രിക്കറ്റ് ഇപ്പോഴും നോക്കി കാണുന്നത് യുവതാരം റിഷഭ് പന്തിനെയാണ്. എന്നാല്‍ ധോനിയുടെ പിന്‍ഗാമിയായി റോബിന്‍ ഉത്തപ്പ പറയുന്നത് മറ്റൊരു പേരാണ്. രാജസ്ഥാന്‍ റോയല്‍സിന്റെ പതിനെട്ടുകാരനാവും ക്യാപ്റ്റന്‍ കൂളിന്റെ പിന്‍ഗാമി എന്നാണ് റോബിന്‍ ഉത്തപ്പ പറയുന്നത്.
റിയാന്‍ പരാഗിലേക്കാണ് റോബിന്‍ ഉത്തപ്പ വിരല്‍ ചൂണ്ടുന്നത്. 2019 ഐപിഎല്‍ സീസണില്‍ ബാറ്റുകൊണ്ട് റിയാന്‍ തന്റെ മികവ് ലോകത്തെ കാണിച്ചു കഴിഞ്ഞു. ഐപിഎല്‍ ചരിത്രത്തില്‍ അര്‍ധ ശതകം നേടുന്ന ഏറ്റവും പ്രായം കുറഞ്ഞ താരം എന്ന നേട്ടം റിയാന്‍ പരാഗ് സ്വന്തമാക്കിയിരുന്നു.
റിയാന്‍ പരാഗിന്റെ ബാറ്റിങ് എന്നെ ഏറെ അത്ഭുതപ്പെടുത്തി. നല്ല വളമിട്ട് നന്നായി വളര്‍ത്തിയാല്‍ ഇന്ത്യക്കായി ഏറെ നാള്‍ ബാറ്റ് ചെയ്യാന്‍ റിയാന്‍ ഉണ്ടാവും. അടുത്ത ധോനി എന്നതില്‍ ഇന്ത്യക്ക് റിയാന്‍ പരാഗില്‍ ഉത്തരവും ലഭിക്കും, ഉത്തപ്പ പറഞ്ഞു. രാജസ്ഥാന്‍ റോയല്‍സിന് വേണ്ടി ഇതുവരെ ഏഴ് കളികളാണ് ഉത്തപ്പ കളിച്ചത്. നേടിയത് 160 റണ്‍സും രണ്ട് വിക്കറ്റും.
റിയാനെ ഓസീസ് താരം സ്റ്റീവ് സ്മിത്തും നേരത്തെ പ്രശംസ കൊണ്ട് മൂടിയിരുന്നു. ക്രിക്കറ്റില്‍ റിയാന്റെ ഭാഗത്ത് നിന്നും വരുന്ന പക്വത അത്ഭുതപ്പെടുത്തുന്നതാണെന്ന് സ്മിത്ത് പറഞ്ഞു. നെറ്റ്‌സില്‍ റിയാന്‍ ബാറ്റ് ചെയ്യുന്നത് കാണുമ്പോള്‍ പരിചയസമ്പത്തുള്ള ഒരു താരം ബാറ്റ് ചെയ്യുന്നത് പോലെയാണ് തോന്നുന്നത്. 17 വയസുള്ളപ്പോള്‍ അവന്റേത് പോലെ ആത്മവിശ്വാസം എനിക്കുണ്ടായിരുന്നെങ്കില്‍ എന്ന് ആഗ്രഹിച്ച് പോവുകയാണെന്നും സ്മിത്ത് പറഞ്ഞിരുന്നു.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ