ബ്രിട്ടനിലെ വിഖ്യാതമായ ടോട്ടനം ഹോട്‍സ്‌പർ ഫുബാൾ ക്ലബ്ബിന്റെ ഫേസ്ബുക്ക് പേജിൽ വീണ്ടും ഒരു മലയാള സിനിമ ഡയലോഗ് എത്തി. മോഹൻലാൽ ചിത്രം 'ദൃശ്യം 2'വിലെ ഡയലോഗാണ് ടോട്ടനം കടമെടുത്തിരിക്കുന്നത്. ദക്ഷിണ കൊറിയൻ താരം സൺ ഹ്യൂങ് മിന്നിന്‍റെ ചിത്രത്തിനൊപ്പമാണ് മാസ് ഡയലോഗ് കുറിച്ചിരിക്കുന്നത്. പോസ്റ്റ് ഏറ്റെടുത്ത് കമന്റ് ബോക്സ് കീഴടക്കിയിരിക്കുകയാണ് മലയാളികൾ.
'അയാൾ അയാളുടെ ടീമിനെ സഹായിക്കാൻ ഏതറ്റം വരെയും പോകും' എന്നാണ് ക്യാപ്ഷൻ. പോസ്റ്റ് കണ്ടയുടൻ 'ആരാണീ അതിഭീകരനായ മലയാളി അഡ്മിൻ?' എന്നാണ് ആരാധകരുടെ ചോദ്യം. ഇതിനുമുൻപും ടോട്ടിനം പേജിൽ മലയാളം സിനിമ ഡയലോഗുകൾ സ്ഥാനം പിടിച്ചിട്ടുണ്ട്.
ചിത്രത്തിന് പതിനായിരത്തിന് അടുത്ത് ലൈക്കുകളാണ് ഇതിനോടകം കിട്ടിയിരിക്കുന്നത്. എഴുന്നൂറിലേറെ കമന്റുകളിൽ ഭൂരിഭാഗവും മലയാളത്തിലാണ്.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ