റിയോ: കോപ്പ അമേരിക്കയിൽ ഉറു​ഗ്വേയ്ക്ക് എതിരെ ജയം പിടിച്ച് മെസിയും സംഘവും. എതിരില്ലാത്ത ഒരു ​ഗോൾ ജയത്തോടെയാണ് മെസിയും കൂട്ടരും ജയിച്ചു കയറിയത്. 

ആദ്യ പകുതിയിൽ മെസിയും സംഘവും കളം നിറഞ്ഞു. മെസിയുടെ അസിസ്റ്റിൽ നിന്നായിരുന്നു ഡൈഡോ റോഡ്രി​ഗ്സ് വല കുലുക്കിയത്. ഹെഡറിലൂടെയായിരുന്നു ​ഗോൾ. റോഡ്രി​ഗിസിന്റെ ആദ്യ രാജ്യാന്തര ​ഗോളാണ് ഇത്. കളി തുടങ്ങി മൂന്നാം മിനിറ്റിൽ തന്നെ അർജന്റീന അവസരം സൃഷ്ടിച്ചിരുന്നു. എന്നാൽ റോഡ്രി​ഗ്സിന്റെ ലോങ് റേഞ്ചർ ഉറു​ഗ്വേ ​ഗോൾകീപ്പർ കയ്യിലൊതുക്കി. 

ഏഴാം മിനിറ്റിൽ മെസിയിലൂടെ വീണ്ടും ​ഗോൾമുഖത്തേക്ക് അർജന്റീന. എന്നാൽ മെസിയുടെ കാലിൽ നിന്ന് വന്ന ലോങ്റേഞ്ചർ ​ഗോൾകീപ്പർ തട്ടിയകറ്റി. ഇവിടെ റീബൗണ്ട് മാർട്ടിനസിന് നേരെ എത്തിയെങ്കിലും വല കുലുക്കുന്നതിൽ പരാജയപ്പെട്ടു. ​75ാം മിനിറ്റിൽ സുവാരസിന്റെ അക്രോബാറ്റിക് ഷോട്ട് വന്നെങ്കിലും ലക്ഷ്യം കാണാതെ പോയി.

ഗോൾ നേടിയതിന് ശേഷം സമനിലയിലേക്ക് വീഴുമോ എന്ന ആശങ്ക അർജന്റീനയ്ക്ക് മേൽ ശക്തമായിരുന്നു. ലോകകപ്പ് യോ​ഗ്യതാ മത്സരത്തിൽ ഉൾപ്പെടെ ഇതാണ് സംഭവിച്ചത്. അതിനാൽ ​ആദ്യ ​ഗോൾ നേടിയതിന് ശേഷം പ്രതിരോധത്തിലേക്ക് അർജന്റീന ഉറു​ഗ്വേയ്ക്ക് എതിരെ വലിഞ്ഞിരുന്നു. എട്ട് ഷോട്ടുകളാണ് കളിയിൽ അർജന്റീനയിൽ നിന്ന് വന്നത്. അതിൽ അഞ്ചും ഓൺ ടാർ​ഗറ്റിലേക്ക് ആയിരുന്നു. 88ാം മിനിറ്റിൽ ഫ്രീകിക്ക് ലഭിച്ചതോടെ മെസിയിലൂടെ അർജന്റീന ലീഡ് ഉയർത്തുമെന്ന് തോന്നിച്ചെങ്കിലും അതുണ്ടായില്ല.