പത്തനംതിട്ട : ശബരിമലയിലേക്ക് തീർത്ഥാടകരെ ആകർഷിക്കാൻ സിനിമ താരങ്ങളെ ഉൾപ്പെടുത്തി പരസ്യം ചെയ്യാനുള്ള തീരുമാനം ദേവസ്വം ബോർഡ്‌ പിൻവലിച്ചു. തീരുമാനത്തിനെതിരെ കടുത്ത വിമർശനം ഉണ്ടായ സാഹചര്യത്തിലാണ് ദേവസ്വം ബോർഡിന്റെ നടപടി. ഇതര സംസ്ഥാനങ്ങളിലെ താരങ്ങളെ വെച്ച് പരസ്യം ഒരുക്കാനായിരുന്നു ആലോചിച്ചിരുന്നത്. 

യുവതീപ്രവേശവുമായി ബന്ധപ്പെട്ട സംഘർഷങ്ങളെ തുടർന്ന് കേരളത്തിൽ  നിന്നുള്ള തീർത്ഥാടകർ മാത്രമല്ല, ഇതര സംസ്ഥാന അയ്യപ്പ ഭക്തരുടെ എണ്ണത്തിലും വൻ കുറവാണ് ഉണ്ടായത്. ഇത് നടവരവിലും കാര്യമായ കുറവുണ്ടാക്കി. ഈ സാഹചര്യത്തിലാണ് സിനിമ താരങ്ങളെ ഉൾപ്പെടുത്തി വിവിധ ഭാഷകളിൽ പരസ്യം ചെയ്യാൻ തീരുമാനിച്ചത്. 

എന്നാൽ ഇതിനെതിരെ വിമർശനം ഉയർന്നതോടെ ദേവസ്വം ബോർഡ് തീരുമാനം പിൻവലിക്കുകയായിരുന്നു.  ഇതിന് പകരം പത്രങ്ങളിൽ പരസ്യം നൽകും. ശബരിമലയ്ക്കെതിരായ കുപ്രചരണം അവസാനിപ്പിക്കാനാണ് പത്ര പരസ്യം. ഈ പരസ്യം വേണ്ട രീതിയിൽ ഫലം കണ്ടില്ലെങ്കിൽ മറ്റു മാർഗങ്ങൾ സ്വീകരിക്കാമെന്നും ദേവസ്വം ബോർഡ് കണക്കുകൂട്ടുന്നു.