തിരുവനന്തപുരം: നാളെ മുതല്‍ സംസ്ഥാനത്ത് ആറ് ദിവസം  തുടര്‍ച്ചയായ അവധി. വീട്ടിലിരുന്നു മടുത്തവരെ വീണ്ടും വീട്ടിലിരുത്തുന്നതാണ് ഇത്തവണത്തെ ഓണാവധി.  3, 4 തിയതികളില്‍ കൂടി അവധിയെടുത്താല്‍ ജീവനക്കാര്‍ക്ക് തുടര്‍ച്ചയായി 10 ദിവസം വീട്ടിലിരിക്കാം.

നാളെ അവധിയാണെങ്കിലും ശമ്പളവും പെന്‍ഷനും വിതരണം ചെയ്യുന്നതിനായി ട്രഷറി തുറന്നു പ്രവര്‍ത്തിക്കാന്‍ ധനവകുപ്പ് നിര്‍ദേശിച്ചിട്ടുണ്ട്. 
ലോട്ടറി ടിക്കറ്റ് തുക സ്വീകരിക്കുന്ന ട്രഷറികള്‍ 1, 2, 10 തിയതികളിലും തുറക്കും. ബീവേറിജസ് ഷോപ്പുകള്‍ 31 മുതല്‍ സെപ്റ്റംബര്‍ 2 വരെ തുടര്‍ച്ചയായി 3 ദിവസം പ്രവര്‍ത്തിക്കില്ല.

 2, 3 തിയതികളില്‍ ബാറുകള്‍ക്കും അവധിയാണെങ്കിലും കഴിഞ്ഞ വര്‍ഷത്തെപ്പോലെ തിരുവോണ ദിവസമായ 31ന് തുറക്കാന്‍ അനുവദിച്ചേക്കും. ഓണം കണക്കിലെടുത്ത് ഇന്നലെ മുതല്‍ അടുത്ത മാസം 2 വരെ കടകള്‍ക്കു രാത്രി 9 വരെ പ്രവര്‍ത്തിക്കാന്‍ അനുമതി നല്‍കിയിട്ടുണ്ട്.

റേഷന്‍ കടകള്‍ക്ക് ഞായറും തിരുവോണ ദിനമായ പിറ്റേന്നും ആണ് അവധി. എന്നാല്‍, ഞായര്‍ തുറക്കണമെന്നു സര്‍ക്കാര്‍ നിര്‍ദേശിച്ചേക്കും. ഇന്നു തീരുമാനമെടുക്കും.