തിരുവനന്തപുരം: സംസ്ഥാനത്ത് കോവിഡ് വ്യാപനം വർധിക്കുന്ന സാ​ഹചര്യത്തിൽ കൂടുതൽ ഡോക്ടർമാരേയും നഴ്സുമാരേയും നിയമിക്കുമെന്ന് മുഖ്യമന്ത്രി പിണറായി വിജയൻ. നിലവിൽ സംസ്ഥാനത്ത് കൂടുതൽ ആരോ​ഗ്യ പ്രവർത്തകരെ ആവശ്യമുണ്ടെന്നും അദ്ദേഹം വ്യക്തമാക്കി. താത്കാലികമായിട്ടായിരിക്കും ഡോക്ടർമാരുടേയും നഴ്സുമാരുടേയും നിയമനം. 

സംസ്ഥാനത്ത് കൂടുതൽ ആരോഗ്യപ്രവർത്തകരെ ആവശ്യമുണ്ട്. കൂടുതൽ ഡോക്ടർമാരേയും പാരമെഡിക്കൽ സ്റ്റാഫിനെയും താല്കാലികമായി നിയമിക്കാൻ നടപടി സ്വീകരിച്ചിട്ടുണ്ട്. വിരമിച്ച ഡോക്ടർമാർ, അവധി കഴിഞ്ഞ ഡോക്ടർമാർരെയും കോവിഡ് പ്രതിരോധ പ്രവർത്തനങ്ങൾക്കായി ഉപയോ​ഗിക്കും. 

ആരോഗ്യ പ്രവർത്തകരുടെ അഭാവമുണ്ടാകാതിരിക്കാൻ ആരോഗ്യവകുപ്പ് അടിയന്തര നടപടി സ്വീകരിക്കും. ഡോക്ടർമാരേയും നഴ്സുമാരേയും ആവശ്യാനുസരണം നിയമിക്കാം. പഠനം പൂർത്തിയാക്കിയവരേയും സേവനത്തിലേക്ക് കൊണ്ടുവരണം. ഉപരിപഠനം കഴിഞ്ഞ് തിരിച്ചെത്തിയവരും വേഗം സേവനത്തിലേക്ക് തിരിച്ചുവരണമെന്നും മുഖ്യമന്ത്രി ആവശ്യപ്പെട്ടു.