വാഷിങ്ടണ്‍: യുഎസിലെ ഹൈസ്‌കൂളിലുണ്ടായ വെടിവയ്പ്പില്‍ രണ്ട് മരണം. ലോസ് ഏഞ്ചല്‍സിന് വടക്ക് സാന്റ് ക്ലാരിറ്റയിലെ സോഗസ് ഹൈസ്‌കൂളിലാണ് വെടിവയ്പ്പുണ്ടായത്. 

സ്‌കൂള്‍ പ്രവര്‍ത്തന സമയം ആരംഭിക്കുന്നതിന് തൊട്ടുമുന്‍പായിരുന്നു വെടിവയ്പ്പ്. ആറ് പേര്‍ക്ക് വെടിവയ്പ്പില്‍ പരിക്കേറ്റിട്ടുണ്ട്. സ്‌കൂളിലെ തന്നെ പതിനാറുകാരനായ വിദ്യാര്‍ഥിയാണ് വെടിവയ്പ്പ് നടത്തിയത് എന്നാണ് റിപ്പോര്‍ട്ട്. വെടിവയ്പ്പ് റിപ്പോര്‍ട്ട് ചെയ്ത് രണ്ട് മിനിറ്റില്‍ തന്നെ പൊലീസ് സംഭവ സ്ഥലത്ത് എത്തി. 

പരിക്കേറ്റ ആറ് പേരില്‍ ഉള്‍പ്പെട്ട കൗമാരക്കാരനാണ് ആക്രമണം നടത്തിയത് എന്ന് പൊലീസ് തിരിച്ചറിഞ്ഞു. തന്റെ ജന്മദിനത്തിന്റെ അന്നാണ് വിദ്യാര്‍ഥി വെടിവയ്പ്പ് നടത്തിയത് എന്ന് യുഎസ് മാധ്യമങ്ങള്‍ റിപ്പോര്‍ട്ട് ചെയ്യുന്നു. 16 വയസുള്ള പെണ്‍കുട്ടിയും, 14 വയസുള്ള ആണ്‍കുട്ടിയുമാണ് മരിച്ചത്. പതിനഞ്ച് വയസിനും 14 വയസിനും ഇടയില്‍ പ്രായമുള്ള വിദ്യാര്‍ഥികള്‍ക്കാണ് പരിക്കേറ്റത്.