തെന്നിന്ത്യന്‍ സ്വപ്ന സുന്ദരി ആമി ജാക്‌സണ്‍ വിവാഹിതയാകുന്നു. ദീര്‍ഘനാളത്തെ പ്രണയത്തിനു ശേഷമാണ് ആമി തന്റെ കാമുകനായ ജോര്‍ജിനെ വിവാഹം കഴിക്കാന്‍ തീരുമാനിച്ചിരിക്കുന്നത്. പുതിയ ചിത്രമായ 2.0യുടെ റിലീസിനു ശേഷമാകും ആമിയുടെ വിവാഹമെന്നാണ് വിവരം. സൂപ്പര്‍ഹിറ്റ് ചലച്ചിത്രം യന്തിരന്റെ രണ്ടാം ഭാഗമായ 2.0യില്‍ ആമിയാണ് നായികാ വേഷത്തിലെത്തുന്നത്.  

ബ്രിട്ടിഷ് മോഡലിങ് രംഗത്തു നിന്നാണ് ആമി ഇന്ത്യയിലേക്ക് എത്തുന്നത്. മദ്രസപ്പട്ടണമെന്ന തമിഴ് ചിത്രത്തിലൂടെയാണ് ആമി നായികയായി അരങ്ങേറ്റം കുറിക്കുന്നത്. ഏക് ദീവാനാ ഥാ എന്ന ചിത്രത്തിലൂടെ ബോളിവുഡിലും സാന്നിധ്യമറിയിച്ചു. സിനിമയില്‍ അത്ര സജീവമല്ലെങ്കിലും മോഡലിങ് രംഗത്ത് ആമി നിറഞ്ഞു നില്‍ക്കുകയാണ്.

ബ്രിട്ടിഷ് ഗായിക ചെറില്‍ കോളിന്റെ മുന്‍ ഭര്‍ത്താവായ ജീന്‍ ഫെര്‍ണാണ്ടസ് വെര്‍സിനിയായിരുന്നു ആമിയുടെ ആദ്യ കാമുകന്‍. ബോക്‌സിങ് താരം ജോ സെല്‍കിര്‍ക്ക്, റയാന്‍ തോമസ് തുടങ്ങിയവരും ആമിക്കൊപ്പം ഗോസിപ്പു കോളങ്ങളില്‍ ഇടംപിടിച്ചിരുന്നു. ഇതിനൊക്കെ ശേഷമാണ് ആമി ജോര്‍ജുമായി അടുപ്പത്തിലാകുന്നത്. ഇരുവരും ഒന്നിച്ചുള്ള ചിത്രങ്ങളും മറ്റും ആമി ഇന്‍സ്റ്റാഗ്രമില്‍ പോസ്റ്റ് ചെയ്യാറുമുണ്ട്.