നടി സോനം കപൂറിന്റെയും ഭർത്താവും വ്യവസായിയുമായ ആനന്ദ് അഹുജയുടെയും വസതിയിൽ വൻ കവർച്ച. ഇവരുടെ ഡൽഹിയിലെ വസതിയിൽ നിന്ന് 1.41 കോടിയുടെ ആഭരണങ്ങളും പണവും മോഷണം പോയെന്നാണ് വിവരം. ആനന്ദ് അഹുജയുടെ മാതാപിതാക്കളാണ് ഇവിടെ താമസിക്കുന്നത്. 

ആനന്ദ് അഹൂജയുടെ മാതാവ് പ്രിയ ആഹുജ ഡൽഹി തുഗ്ലക് റോഡ് പൊലീസിൽ പരാതി നൽകിയതായും റിപ്പോർട്ടുകളുണ്ട്. മോഷണം എന്നാണ് നടന്നതെന്ന് കൃത്യമായി അറിയില്ലെന്നാണ് പരാതിയിൽ പറയുന്നത്. രണ്ട് വർഷങ്ങൾക്ക് മുൻപ് പൂട്ടി വച്ച ആഭരണങ്ങളും പണവുമടങ്ങിയ കബോർഡ് പിന്നീട് ശ്രദ്ധിച്ചിട്ടില്ല. പരാതിയെത്തുടർന്ന് വീട്ടിൽ ജോലി ചെയ്യുന്നവരെ പൊലീസ് ചോദ്യം ചെയ്തുകൊണ്ടിരിക്കുകയാണ്. സിസിടിവി ദൃശ്യങ്ങളടക്കം പരിശോധിക്കുന്നുണ്ട്. 

ആനന്ദിന്റെ മുത്തശ്ശി സരള അഹൂജയ്ക്കൊപ്പമാണ് അച്ഛൻ ഹരീഷ് അഹൂജയും അമ്മ പ്രിയയും താമസിക്കുന്നത്. ഫെബ്രുവരി 11ന് അലമാരയിൽ സൂക്ഷിച്ചിരുന്ന ആഭരണങ്ങളും പണവും പരിശോധിച്ചപ്പോഴാണ് മോഷണം നടന്ന വിവരം അറിഞ്ഞതെന്ന് സരള അഹൂജ പറഞ്ഞു. ഇതിൽ ഒരു കോടി 41 ലക്ഷം രൂപയുടെ ആഭരണങ്ങളും പണവും നഷ്ടപ്പെട്ടതായാണ് കണക്ക്. ഏകദേശം രണ്ട് വർഷത്തിന് ശേഷമാണ് സരള അഹൂജ ഈ ബാഗ് തുറന്നത്. ഫെബ്രുവരി 23നാണ് പരാതി നൽകിയത്.