തിരുവനന്തപുരം: കെപി അനില് കുമാര് കോണ്ഗ്രസ് വിട്ടത് അടഞ്ഞ അധ്യായമെന്ന് കെ മുരളീധരന് എംപി. സിപിഎം വെയ്സ്റ്റുകളെ സ്വീകരിച്ചുകൊണ്ടിരിക്കുകയാണെന്ന് താന് നേരത്തെ പ്രതികരിച്ചതാണ്. അതില് കൂടുതല് ഒന്നും പറയാനില്ലെന്ന് മുരളീധരന് മാധ്യമ പ്രവര്ത്തകരോടു പറഞ്ഞു.
ഡിസിസി അധ്യക്ഷന്മാരുടെ പട്ടിക വന്നപ്പോള് പെട്ടിതൂക്കികളും കൂട്ടിക്കൊടുപ്പുകാരും എന്നാണ് അനില് കുമാര് പ്രതികരിച്ചത്. അങ്ങനെ പറയുന്ന ഒരാള്ക്കെതിരെ നടപടിയെടുക്കാതെ പിന്നെ കെട്ടിപ്പിടിച്ച് ഉമ്മ നല്കാനാവുമോയെന്ന് മുരളീധരന് ചോദിച്ചു.
മുതിര്ന്ന നേതാക്കള് ഒന്നൊന്നായി കോണ്ഗ്രസ് വിടുന്നതു ചൂണ്ടിക്കാട്ടിയപ്പോള് ടാങ്ക് ഫുള് ആവുമ്പോള് കുറെ വെള്ളം പുറത്തുപോവും എന്നായിരുന്നു മുരളീധരന്റെ പ്രതികരണം. അതുകൊണ്ട് ടാങ്കിലെ വെള്ളത്തിന് കുറവൊന്നും വരില്ലെന്നും മുരളീധരന് പറഞ്ഞു.
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ